Mahadlok makapasakit

Dear Tita Salie,

A pleasant day. Just call me Dave, 17 years of age, ulitawo ug ania ako karon nagpuyo sa balay sa lain aron motrabaho.

Aduna koy hinigugma, Tita, nga labihan ka istrikto ang pamilya. Arangan man gud ang ilang kahimtang ug mao siguro ang hinungdan nga lahi sila motratar og mga tawo. Samot pa gyod nga gamay ra kaayo ang ilang pagtan-aw nako tungod kay ania man ako nagpuyo sa balay sa iyang auntie. Nisulod ko diri isip sulogoon kay lisod man kaayo ang among pagpuyo uban sa akong mga ginikanan.

Dili lalim ang akong kaagi diri, Tita. Wala koy kalipay samtang anaa ko sa ilang mga kamot apan ako lang kining giantos kay nagkinahanglan man gyod ko sa ilang tabang.

Nasayod sila sa among relasyon sa ilang pag-umangkon. Busa gibalibali ko nila og kasaba. Sakit kaayo silang manulti batok nako. Ug nahadlok ako karon, Tita, nga tingali og dili na kami magkita sa akong uyab kay supak man kaayo sila sa among relasyon kay lagi usa man lang ako ka uyamot nga sulogoon. Nahadlok sab ako nga mausab ang pagbati sa akong uyab ngari nako. Nahadlok sab ako nga sa ako unyang kasuko sa iyang mga ginikanan ug iyaan siya na unya ang akong mapasakitan.

Unsa kahay akong buhaton niining sitwasyona, Tita? Palihog pasabta ko. Daghang salamat sa imong pagtagad. -- Dave

* * *

Dear Dave,

Aduna gyoy daghang mga tawo nga dili pantay ang ilang pagtan-aw sa laing mga tawo. Kun kabos ka lang dili ka usahay ilhon nga tawo. Ug kasagaran baya nga mobuhat niini mga edukado kaayo, mga tawo nga tag-as kaayo ug naabot sa ilang pag-eskuyla. Mga tawo nga atong gilauman nga nakasabot sa atong kahimtang kay lagi mga utokan ug edukado.

Pasensyahe lamang sila kun makaya pa nimo, kun madawat pa nimo ang batasan nila. Ayaw paghimo og dautan nga mas makadaut sa imong pagkatawo. Buhata lang kun unsay dapat nimong buhaton samtang nangalagad ka anang balaya ug pasagdi sila sa ilang mga gipanulti. Apan kun sobra na gyod ang gibuhat nila kanimo pangita na lang og laing kasudlan og trabaho ug ayaw pag-antos nianang lugar nga moila sa imong pagkatawo.

Pasagdi ang kahigayonan ug kapalaran ang motakda sa imong kinabuhi sa gugma. Dawata kun maoy ilang gusto nga dili namo magkita. Pulos pa kamo mga bata ug daghan pa ang mahitabo sa inyong kinabuhi. Tuohi nga ang gugma mangita gyod og paagi nga mahimong malampuson. Kun kamo ang magkadayon imo ra gihapon siyang maangkon. -- Tita Salie