Mata sa Kasingkasing

Gula 13

“Mao nay imong pagtuo. Pero ang tinuod nangita lang na siya og saktong higayon pagpanguyab nimo.”

“Imposibleng mahitabo na, Day.”

Unya gisimang ni Angeline ngadto sa laing topic ang panagsulti nila ni Vera. Dili na siya buot nga motaas pa ang ilang panaghisgot bahin ni Erik.

Pagkasunod adlaw, misuroy si Angeline sa Tagbilaran City Square. Nakita niya si Erik. Nagkaon kini uban sa usa ka babaye. Si Almina!

Milikay si Angeline kanila. Mipaingon siya sa nahimutangan sa outlet sa alahas. Bisan wala siya’y planong mopalit. Mitan-aw siya sa mga display nga mga relo, singsing, kuwentas ug uban pa.

Pagkataudtaod dihay kamot nga mitugpa sa abaga ni Angeline. Sa iyang paglingi iyang nakita si Erik nga nagpahiyom.

“Mopalit ka ba’g alahas?” Nangutana si Erik kaniya.

“Dili, uy,” tubag ni Angeline. “Way kuwarta.”

“Kun gusto ka palitan tikaw.

“U-unsa?”

“Wa ko magkomedya, Angeline.”

Kalit lang miduol si Almina kanila ug gibunlot ang kamot ni Erik.

“Tana uy,” may kalagot ang tingog ni Almina. -- Sumpayan pa