Walay hilig mag-abroad si Wily. Para kaniya kontento na siya sa gamay niyang kinitaan pinaagi sa pagpamanday. Maayo ang iyang agalon nga usa ka Insek nga si Mr. Sia. Kong duna siya problema parti sa pamilya, sa way langas mohatag dayon si Mr. Sia ilabi na kong nahitungod sa sakit sa ilang mga anak ni Lea nga iyang asawa. Apan ang iyang asawa mao gayod ang miagni kaniya nga mag-abroad.
“Gamita ang imong abilidad, Wil,” matud ni Lea usa ka gabii niana sa dayon na nilang pangatulog. “Asa ra si Mando kong itandi kanimo. Busa, sulay sa pag-aplay. Naay recruiter nga nag-anunsiyo nga nanginahanglan sila’g mga trabahante para sa Kuwait.”
Hinuon, makataronganon usab si Lea kay nia ra gayod siya sa Pilipinas, ang iyang kitaon, kutob lang gayod sa pagkaon. Maayo usab nga makaadto siya sa abroad, kay makatilaw siya sa kinabuhing abroad.
Wala mosupak ang iyang agalon nga mo-abroad siya ngani, miingon pa gani kini nga kun unsa man gani ang kaapiki sa iyang pamilya, dili, lang kini magpanuko pagduol kaniya.
“Salamat, Sir,” pulong ni Wily. “Basin sa sunod bulan, makalarga ako human sa akong medical examination.”
Didto sa Kuwait, nalipay si Wily kay daghan ang iyang mga kauban nga mga Pilipino. Naay mga Indiano, apan mas daghan gayod ang mga Pilipino nga halos ang tanan mga taga Luzon.
Maayo na man unta ang dagan sa iyang trabaho kay makapadala naman siya’g kuwarta kang Lea apan wala palandonga, nahitabo ang usa ka disgrasya diha sa ilang kompaniya. Maayong pagkasunog sa dakong tubo nga maoy mikutay sa dakong pabrika sa lana. Nagkapuliki ang mga tawo lakip na si Wily pagpalong sa sunog nga miapil na halos sa tibuok pabrika.
Tulo ka adlaw ang paglungtad sa sunog. Naay mga Arabo ang naapil sa pagkasunog ug maayo nalang nga wala’y mga Pilipino ang nahimong biktima. Tungod niini, gideklarar ang kompaniya nga dakong alkansi busa napugos ang ilang kompaniya sa pagpapauli sa tanang mga trabahanting Pilipino.
Maayo ang Arabo nga maoy tag-iya sa kompaniyang gitrabahoan ni Wily busa, gibayaran sila sa tanang benepisyo nga angay nilang dawaton sulod sa pipila lang ka bulan sa ilang pagtrabaho.
Hinuon, mipasalig ang ilang agalon nga iniglabay sa pipila ka bulan human sila makapauli sa Pilipinas, tawagon ra sila human mahusay ang tanang kadaot sa pabrika.
Natingala si Lea nga mitawag si Wily ug matud pa niini, taliabot siya ug kinahanglan nga sugaton siya sa tugpahanan sa dakbayan sa Cagayan de Oro.
Unsa man kaha ang hinungdan nga mipauli si Wily? Nganong kalit man lang kini? Unsa man kaha ang atraso ni Wily nganong miuli man kini dayon? Ang problema ra ba ni Lea kay nasugdan na ra ba niya ang ilang balay ug maguol gayod siya kun dili kini mahuman. Hinuon, sutaon niya kong unsa ang hinungdan sa kalit nga pagpauli ni Wily bisan wala pa mahuman ang iyang kontrato. (Kataposan)