Gula 8
Nasabtan niya nga buot pa untang mangutana si Allan kun nganong ania sila mohunong sa maong dapit apan wala na kini makabungat. Ingon sa gikumpayotan ang balatian niini sa panagana nga tingali’g masuko na usab siya sa pagkamaukiton niini. Nagpakahilom lang ang ulitawo.
Nakita nila ang makililimos-bata ug tigulang nga nanag-atang sa moagi nga manimbahay. Dihadiha gikuha ni Salie ang iyang tape recorder nga gipahimutang sa luyong lingkoranan sa awto ug unya nanaog. Misunod pagkanaog si Allan nga wala’y tingogtingog. May gisab-it kining kamera sa iyang liog ug andam na sa pagkuha’g hulagway kun momando ang dalaga. Gisugat sila sa babayeng naninda’g kandela apan ila kining gibalibaran. Giduol nila ang duha ka batang makililimos nga nagkabulingit ug wala’y kaligo.
“Retratohi sila,” giingnan ni Salie si Allan samtang wala pa makamatikod kanila ang mga bata.
Abtik nga mituman si Allan sa mando samtang ang dalaga mihimo og interbiyo ngadto sa mga makililimos.
Hapon na sa pagpauli ni Salie sa iyang gipuy-an. Mibati siya’g kakapoy. Tibuok adlaw silang naglibotlibot si Allan sa siyudad. Ingon sa tulin kaayo ang pag-aginod sa mga takna, wala lang hibaw-i nga alas singko imedya na. Ang kangitngit mihinayhinay na paggukod sa nagkaluyang kahayag.
Gidiretso ni Salie ang kotse sa garahe. Human mapawong ang makina niini nahaurong siya’g kadiyot. Kalit milandong sa kasubo ang iyang nawong dihang misantop si Suzette sa iyang hunahuna. Nakapanghupaw siya samtang gisad-ay ang mga bukton sa manibela. Nahapatan-aw siya sa may bentana. Daw sa pagahikit-an niya si Suzette nga nanambo sa didto sa bentana ug mikaway kaniya ug unya midali kini pagdagan aron pagbukas sa pultahan. Miawop ang panan-aw ni Salie ug may luhang namidpid sa iyang kaapingan. -- Sumpayan pa