Salamat Senyor Santo Niño

Pag-abot ni Berto sa pultahan sa Basilica nga naglakaw nga nag-angkihod, niluhod dayon siya sa sementong sawog. Niyukbo ug nihalok sa sawog. Ang kakutas ug kakapoy niya sa lakaw gikan sa Banawa, giluhod na lang niya. Gitrapo niya ang ubos sa iyang T-shirt sa iyang nawong nga natumog sa singot.

Alas kuwatro pa sa kaadlawon pagbiya niya sa ila. Karon alas sayis i media na sa buntag sumala sa dakong wall clock sa simbahan nga napasiklapan niya. Dako niyang pasalamat sa Diyos nga nakaabot pa gyud siya dinhi nga may kinabuhi pa. Sa iyang paminaw, hapit na siya mamatay. Apan sa dili pa ni mahitabo, mangayo siya’g pasaylo sa Diyos.

Bukog ug panit na lang siya. Tungod sa iyang hayblad ug dayabitis. Gawas anang mga sakita, duna pa siya’y cancer. Cancer iyang pagtuo kay naputos sa dagkong bugon iyang kalawasan. Sama sa bola sa golf ang kadagko sa mga bugon. Apan ang labing dako nga naa gyud sa sentro sa iyang dughan, sama kadako sa iyang komo.

May diperensiya pa gyud iyang mga tiil. Wa na magtopong. Maong kimpang iyang linakwan. Ang iyang tiil daw nikolo o nimobo og balig upat ka pulgada. Niresulta ni adtong nadakdak siya sa gutter sa karsada pagkanaug sa taksi pagpauli usa ka gabii nga hubog kaayo. Matud sa doctor iyang gikunsultahan, dunay crack o liki iyang bukog sa dapidapi.Ug kinahanglang operahan kay na-dislocate og gamay ang bukog.

Gipadalhan siya’g otsinta mil pesos sa iyang maguwang nga si Bella para gasto sa operasyon. Wa niya gastoha sa operasyon. Wa siya nagpaopera. Gihurot niya ang kuwarta sa sugal, inom ug babaye. Maong gibiyaan siya sa iyang kapikas nga si Linda ug ilang duha ka anak nga hayskul na nga sila si Gina ug Greg. Nag-inusara na lang siya sa ilang balay sa Banawa.

Nagpakilimos nalang siya sa iyang mga kauban sa trabaho sa una. Sa mga sekyu sa Kapitolyo (CSU). Tungod sa iyang sakit, napugos siya pag-retire sa trabaho. Wa siya kadawat sa mga benefits kay kulang og usa ka tuig iyang length of service. Kinse ka tuig ang serbisyo sa makadawat. Iya katorse ra. Maayo gani kay iyang asawa may negosyo nga Internet Cafè.

Baga ang duot sa katawhan nga nisulod sa simbahan kay Biyernes ron sa buntag. Tingnovena sa Santo Niño. Unya hapit na sab moabot ang kapistahan sa Patron. Duha ka semana na lang. Dihang nawala na ang kutas ni Berto, nihinay siya’g lakaw nga nagluhod padulong sa altar subay sa tunga nga pasilyo sa Basilica.

“Ginoo ko, Senyor Sto. Niño, nia ko aron pagpangayo’g pasaylo sa akong mga sala. Andam na kong modawat sa kamatayon. Kay ikaw ang naghatag sa kinabuhi. Ikaw sab ang mobawi. Apan kay gipahulam ko nimo’g kinabuhi, daghang salamat sa imong pagpahulam. Kun tagaan kog higayon nga matawo pag-usab, ayohon na gyud nako’g dala akong kinabuhi. Apan sa mao gihapon, salamat Senyor Santo Niño sa kinabuhi,” nagkibutkibot ang baba ni Berto. Nagtulo iyang mga luha.

Pag-abot niya tungod sa altar, niyukbo na sab siya ug nihawok sa sawog. Pagkahanaw sa iyang kutas, nanamilit siya sa imahen ni Senyor Santo Niño. Ug nitalikod. Nihinay og barog. Nihinay siya’g kiangkiang padulong sa gawas. Ug naglakaw ra gihapon siya balik sa Banawa.

Pagkasunod buntag, nakamata siya sa tumang kahayag. Gisulawan siya. Abli ang pultahan sa iyang lawak ug may tulo ka mga anino sa tawo iyang nakita. Nagbarog sa pultahan.

“Kamatayon na ba kaha ni? Ug dad-on na ko sa tulo ka hari o tulo ba kaha ka demonyo?!” tuaw niya sa hilom. “Diyos ko! Ikaw na lay mag-igo nako!:

“Berto! Berto! Mata!” sinati niyang tingog sa babaye.

“Linda? Ikaw?” ni Berto nga nidalig bangon ug nilingkod sa katre. “O ako. Nia ko ug atong mga anak.Kay nagpahibawo nako si Baldo inyong chief security. Nga pabalikon ka’g trabaho. Kay anogon kuno imong length of service,” ni Linda nga nitupad og lingkod sa kapikas.

“Maayong buntag pa” nangamin ang mga bata.

“Unsaon man nako pagtrabaho? Nga bardado na man ko?” ni Berto? “Iasayin lang kono ka’g opisina” ni Minda.

“Wa na diay ka masuko nako? Kay nipauli man ka?” ni Berto. (Tua na man sila puyo sa giabangang commercial space para sa Internet Cafè).

“Gipadamgo si mama ni Santo Niño, nga patagaan ka’g ikaduhang higayon nga magbag-o” ni Gina.

Siya nalang ang nitubag. Kay gituhop sa emosyon si Linda. Di makatingog. Labi na nagtan-aw siya sa bana nga wa nay mga bugon sa lawas.

“Salamat Senyor Sto. Niño!” ni Berto nga nihangad ug nibayaw sa iyang mga palad ngadto sa kisame. Sukad adto kada Biyernes na mosimba si Berto ug tibuok pamilya sa Basilica. (Katapusan)