Matag hapon magpaabot si Segundina

Puwerteng hilaka ni Segundina dihang gitaho sa mga kauban niining mananagat nga wala na gyud nila makita si Anas dihang nahagbong kini sa dagat. Duna man gud kuno’y kusog kaayong unos nga mikusokuso sa ilang bangka de motor ug tungod sa kakusog sa unos nakulob ang bangka ug si Anas nalagpot sa layo.

Paglurang sa unos, dihang linaw na, ilang gipaningkamotan nga makit-an si Anas apan hiabtan na lang sila’g kahapunon wala na gyud nila makita si Anas. Buhi o patay ba kini mao kanay ilang gitinguha nga masayran kay wa na man gyud nila kini igkita, sa sige nila’g sawom sa lawod.

“Wala kaha to kan-a sa iho, Tikyo?” ni Minda pa nga asawa ni Tikyo nga nabalaka pud intawon sa nahitabo ni Anas.

Bag-o pa ra ba intawon silang gikasal ni Segundina ug niadtong miaging bulan pa lamang.

Kini si Tikyo mao ang nangulitawo kaniadto ni Segundina sa wala pa manguyab si Anas. Apan sa dihang nakita ni Tikyo nga lupig siya ni Anas sa pagpaninguha niini sa gugma ni Segundina maong miatras na lang siya ug anak dalaga na lang nila ni Imoy-Toyang ang iyang gi-ulitawhan ug mao na gyu’y iyang gipangasawa.

Nahigugma ra ba unta siya kang Segundina kay guwapa lagi kun itandi kang Minda. Si Minda itomon nga pagka-babaye samtang si Segundina may pagka-mestisahon ug daghan sa mga lalaki dinhi sa sityo Bagol-Luwag ang naibog sa dalaga apan wala sila’y nahimo kay ang kasingkasing ni Segundina didto man mopitik kang Anas.

“Aw, wa ta kahibawo, kay nag-iyahay na man lang mi’g paningkamot nga dili makabuhi sa gigakos namong katig sa bangka nga nakulob,” miginhawa og lawom si Tikyo. “Bata pa kaayong mabiyuda si Segundina kun mahitabo man nga si Anas patay na.”

“Basin og gidagsa to’g isla, Tikyo,” ni Minda pa.

“Aw, basin tuod, Minda.” Unya usa ka hapon nakita ni Tikyo si Segundina nga naglingkod sa pangpang sa baybayon. Naglantaw kini sa halayong lawod. Giduol kini ni Tikyo.

“Segundina,” hinay niyang sangpit.

Mikalit kini’g lingi ug ingon sa misiga ang mga mata. Gibati og kataha si Tikyo.

“Buhi si Anas, Tikyo, di ba?” Buhi to siya?” kahilakon si Segundina. “Mamatay tingali ko kundili na mopatim-aw si Anas.”

“Semana na kapin, Segundina, ug ako nagtuo nga patay na si Anas, kay daghang iho kadtong nalunoran sa among bangka de motor,” hinay nga namulong si Tikyo.

Mitindog si Segundina nga way tingogtingog ug gibiyaan si Tikyo. Ginuntan na lang ni Tikyo si Segundina nga nagkalayo na ug sa iyang nakita ingon sa wala pa gyud matibhangi ang katahom niini ug dunay itom nga laraw ang namugna karon sa iyang hunahuna. Karong gabii sak-on niya’g hilom si Segundina ug iyang pahimuslan ang pagka-babaye niini. Apan kaganina nakalitan siya sa tinan-awan niini nga puwerteng sigaha sa mga mata nga mikalit og tutok kaniya. Apan wala kini hatagi’g gibug-aton ni Tikyo kay ang kaanindot sa lawas ni Segundina nga nindot pa kang Minda maoy naghari karon sa iyang kahiladman. O, Segundina, Segundina, karon nang higayona nga maangkon na tika nga wala na si Anas, nagkanayon si Tikyo sa hilom.

Matag hapon moadto gyud si Segundina sa pangpang aron huwaton si Anas ug unya inig tikyop sa kangitngit mopauli kini sa ilang balay nga mag-inusara. Ug karong gabhiona sa pagsaka ni Segundina sa ilang balay diha na si Tikyo.

Gigakos dayon ni Tikyo si Segundina ug gidigo sa mga halok niini. Wala molihok si Segundina. Nagpatara lang kini. Dihang gihubo ni Tikyo ang sapot niini, pag dihang hubo na ang lawas niini nga nagbarog sa atubangan ni Tikyo kalit lang kining nahimong usa ka dakong iro nga itom ug gipaakpaak si Tikyo apan nakaambak kini sa bentana ug nagpaninggit kini nga nagdagan ug niini pa, “tabanggg!! tabanggg mga silingannn! Kay gibugno ko ni Segundinaaa! Usa siya ka mangtaass! Aaaaaaa!”

“Way makadungog nimo, Tikyo!” ni Segundina pa nga usa gihapon ka itom nga iro.

“Oo, ako ang mangtas nga asawa ni Anas, kay si Anas usa ka mangtas nga ungo, ug buhi siya kay ako mismo nahibawo...tua lang siya sa isla Dulomdulom, ang dapit sa iyang mga kaliwatttt, he, he, he, wakkkk, awoooo!” Ug gitiwasan na gyud ni Segundina si Tikyo og kuniskunis. (Kataposan)