Si Ondo ug ang Santo Niño

Nagdasok ang daghang mga tawo nga nanglabang sa dalan ug ang kakusog sa sound system nga gigamit sa nagrosaryo nga mga deboto nga nagsunod sa karo ni Senyor Santo Niño maoy misibaw sa pangdungog ni Ondo nga nakadugang kaayo sa mga kahasol sa pag-agi sa giluwanan niyang motorsiklo sa paglabay niini sa dalan Colon.

“Samoka sad aning lugara uy,” nagbagulbol ang hunahuna ni Ondo nga mipaaginod sa pagpadagan sa giluwanan niyang motorsiklo nga naglisod sa pag-agi tungod sa kadaghan sa mga tawo nga nanglakaw sa dalan alang sa ilang pagsaksi sa Sinulog.

“Pastilan kining mga tawhana,” dugang bagulbol sa hunahuna ni Ondo. “Nadala gyod pag-ayo sa gitingal sa mga langyaw nga Katsila sa pagtuo sa imahen ni Senyor Santo Niño nga magsayawsayaw anang karsada nga nakahatag na hinuon og kahasol sa ubang mga tawo.”

Mipadayon sa pagpaaginod si Ondo sa iyang motorsiklo hangtod nga nahidangat kini sa pikas bahin nga karsada nga panagsa na lamang ang mga tawo nga moagi sanglit nahimutang na man sa layo nga bahin sa giagian sa mga deboto nga misalmot sa tinuig nga prosesyon.

Supak si Ondo sa gihimong kalihokan sa mga deboto ni Senyor Santo Niño nga pagprosesyon sa imahen sa kadalanan sanglit makahatag man kini og kahasol sa mga tawo nga molabay sa mga dalan sa dakbayan.

“Kun mag-ampo man gani ngadto sa Ginoo labing maayo unta nga anha na lang sa sulod sa simbahan,” ni Ondo pa ngadto kang kompare niya Tibor nga iyang silingan nga iyang gikahinabi kaganihang buntag.

“Kay ngano man diay, Pre?” nakapangutana si Tibor.

“Kay samok na man god kaayo sa mga tawo nga nagdali sa ilang trabaho, Pre,” tubag ni Ondo kang Tibor.

“Kuan pre,” ni Tibor pa. “Naandan na man gud na nga iprosesyon ang imahen ni Senyor Santo Niño sa dili pa ang Sinulog.

“Pastilan,” daw milihok ang duha ka dunggan ni Ondo. “Ugma Sinulog pa gyod”. “Mao na Pre,” ni Tibor pa. “Sinulog na pod ugma ug na minilyon na sad ka mga deboto ug mga dumoduong ang mag-ambahan ugma sa pagsaksi sa Sinulog.”

“Mosamot pa gyod og kasamok ugma ang karsada,” nagkanayon si Ondo nga mipaingon sa pagsakay sa gi-parking niyang motorsiklo.   

“Asa na man ka, Pre?” paapas pangutana ni Tibor sa iyang kompare.

“Adto ko sa langit, Pre!” ni Ondo pa dayong paandar sa iyang motorsiklo nga bag-o pa niyang gipalit sa usa ka motorcycle center sa dakbayan sa Mandaue.     

Gipabulhot ni Ondo sa pagpadagan iyang giluwanan nga motorsiklo sa pag-apas sa oras nga nalangan tungod sa daghan kaayong mga tawo nga nanglabang sa karsada nga iyang giagian.

Naghaguros sa pagdagan ang motorsiklo ni Ondo nga mitadlas sa dalan national sa tinguha nga madali sa pag-abot sa dapit nga iyang pagaadtoan.

Samtang kusog kaayo nga nagdagan wala lamang niini damha nga nawad-an og kontrol ang gidala niyang motorsiklo hangtod nga nabangga kini sa gutter sa karsada.

Gumikan sa kakusog sa maong pagbangga daw papel si Ondo nga milupad sa ibabaw nga bahin gikan sa iyang motorsiklo nga mikagay usab dihang nahagsa sa sementadong karsada.

Wala’y nahimo si Ondo gawas sa pagpiyong na lamang sa iyang mga mata ug nagpaabot sa dangatan sa iyang paghagsa ngadto sa kinaubsan nga bahin niini.

Bisan sa nagdibal niyang gibati nga nagpaabot sa mahitabo daw iyang nabatyagan ang gagmay nga mga bukton nga nagsapwang kaniya nga maoy nakaaghat sa pagpugos og buka sa iyang mga mata alang sa pagsuta niini.

“U-unsa kining dapita?” nakapangutana si Ondo sa naglibot kaniya nga pulos nagsul-ob og sapot nga lubos puti.. “U-unsay nahitabo kanako?”

“Nia ka sa hospital, Sir.” Sa doktor pa nga nag-atiman kang Ondo nga gibalikan na sa maayong panimuot. “Naaksidente ka, Sir.” Nagkanayon ang doktor.. “Maayong pagkalumping sa imong motorsiklo nga nahagsa sa sementadong karsada ug suwerte kaayo ka nga igo lang nakuyapan ug wala makasinati og kadaut sa maong hitabo.”

Nagdali pagbangon si Ondo gikan sa iyang gihigdaan ug maoy nabantang sa iyang panan-aw ang imahen ni Senyor Santo Niño nga diha sa altar nga nahimutang sa ward sa maong tambalanan nga nakahatag usab sa pagtagad sa tanan nga diha niadtong higayona.

“S-siya,” ni Ondo pa nga mitudlo sa imahen ni Senyor Santo Niño. “Siya ang nagluwas kanako.”

“Salamat sa pagluwas Mo kanako,” ni Ondo pa nga miluhod nga nag-atubang sa imahen ni Senyor Santo Niño. “Salamat ug Viva Pit Senyorrr!!!” (Katapusan)