Man Hater

Gula 4

“Ikaw nay maantigong mosabot kaniya, Hijo,” miingon si Mr. Suarez nga ang gipasabot mao si Salie. “Kami dinhi naka-adjust na sa iyang kinaiya. Ingon gayod siya niana, maldita ilabi na ngadto sa mga lalaki. Nailhan siya dinhi sa publikasyon nga usa ka man hater.”

“Man hater?” mihun-ag sa kaligdong ang panagway ni Allan.

“Oo,” sa editor pa. “Busa pagmatngon sa imong mga lihok kun kauban mo siya. Ayaw panantsing niya kay tingalig malintian ka.”

“Timan-an ko kana, Chief,” ug may ipangutana pa unta si Allan sa ilang editor mahitungod kang Salie, apan giingnan na siya sa lagas nga pasundon sa dalaga. Midali na lang siya pag-agpas kang Salie didto sa gawas nga wala ikabungat ang iyang buot ipangutana sa editor.

Nakasakay na si Salie sa iyang auto (usa ka Toyota Corollas 1.6 GLi) paggawas ni Allan. Misakay gilayon ang ulitawo sa unahang lingkoranan tupad kaniya nga maoy magmaneho.

“Wa ka bay sakyanan?” nangutana ang dalaga. Wala siya motan-aw sa ulitawo.

“Aduna man,” daling tubag sa ulitawo. “Tuas ba’y. Nasayod man gud ko nga mag-uban sa usa lang ka sakyanan ang...”

“Nasayod ko,” salo ni Salie sa gisulti sa lalaki. “Ayaw na pagtabi diha!”

“Yuna pa,” mitutok ang ulitawo kaniya. “Nasuko ka ba nako?” karon pa gani ta magkaila unya may atraso na dayon ko nimo?”

“Wa!” gibundak ni Salie ang iyang tubag ug mipakita sa tinuod niyang kinaiya nga wala’y lipodlipod.

“Tinuod tingali ang giingon ni Chief...”

“Nga unsa?” -- Sumpayan pa