Sinugatan sa Bag-ong Tuig

Tungod sa kadaghan na sa bino nga ilang nainom, luhag na kaayo ang pundok nila ni Arnold. Magsigi na gani og paninggit ang uban kanila sa mga tawo nga mangagi diha sa karsada. Ang uban usab hinuon nagsigi lang og kanta sa mga alawiton sa Pasko. Labi na sa kanta nga “Kasadya”.

Bisperas naman god sa bag-og tuig. Gani, pipila nalang ka oras magsugod na ang misa sa mga simbahang katoliko aron pagsugat sa bag-ong tuig. Mao man bitaw nga ubay-ubay na ang mga tawo nga nagganayan paingon sa simbahan sa lungsod aron pagsalmot sa pagahimuong misa.

Si Arnold, nga maoy giilang lider sa ilang pundok, kumo mao may tubig-tubigan, hubog na usab kaayo. Magkayuring na kining mosulti. Ug dako ra ba kaayo’g tingog. Nga milanog gani pag-ayo hangtod na gawas sa tindahan nila ni Ruel. Diha man god manag-inom ang pundok nila ni Arnold sa sulod sa tindahan nila ni Ruel.

“Dili diay mo manimba Nold?” Gipangutana ni Ruel ang giilang lider sa pundok. Tuyo man god unta niya nga manglakaw na kini ug mohunong na sa pag-inom kun mahinumdom kini nga may misa diay didto sa lungsod.

“Manimba? Walay nadato nianang pagsigi og simba,” mao kini ang gitubag ni Arnold ngadto kang Ruel. Dungan ang pagyarok sa sulod sa baso nga iyang gikuptan. Wala nalang usab magtingog pa si Ruel. Apan masabot kaayo nga napikal kaayo si Ruel sa tinubagan ni Arnold.

Sa dihang hapit na gayud mag-alas dose sa tungang gabii misugod dayon og pakapaka ang mga nagkalainlaing pabuto didto sa gawas nga bahin sa may tindahan nila ni Ruel. Ug namatngunan nalang ni Ruel nga midali og gawas si Arnold.

Pagkataudtaod mibalik kini nga nagdala na og mga pabuto. Gani, giitsahan pa ni Arnold og pabuto ang iyang mga kaubanan nga nagsigi gihapon og inom.

Kay nanagan man ang kaubanan ni Arnold, wala niya madayon og labay ang nadagkutan na ra ba niyang pabuto. Nga usa ra ba ka “super lolo”. Gisigihan lang gihapon niya kini’g bitbit. Ug hangtod nga mibuto gayud kini, diha sa iyang walang kamot. Sipa kaayo ang buto nga milanog diha sa sulod sa tindahan nila ni Ruel.

Nagping-it sa tumang kasakit si Arnold samtang nagpugong sa wala niyang kamot. Iya man god kining gipugngan pag-ayo aron dili kaayo makaagas ang dugo. Gikan sa naputol niyang mga tudlo. Nahurot man god og kaputol ang upat niya ka mga tudlo.

Misamot na usab kalanog ang buto-buto didto sa gawas nga bahin sa tindahan nila ni Ruel. Alas dose naman god diay sa tungang gabii. Ug kadtong mga buto-buto maoy silbing pagsugat sa bag-ong tuig.

Human sa buto-buto, misunod usab dayon ang siren sa ambulansya. May kauban diay si Arnold nga midali’g adto sa lungsod aron pagkuhag ambulansya nga maoy masakyan   ni Arnold paingon sa ospital. (Katapusan)