Gula 3
Namatikdan sa dalaga nga mitutok ang lalaki kaniya. Misukol siya sa pagpakigtinutokay niini. Mipahiyom ang lalaki ug nakita niya ang puti ug tupong nga mga ngipon niini.
“Glad to meet you, Miss...”
“Salie Valle. Miss Salie Valle.”
“Delfino ang family name, ko,” ni Allan dungan ang pagtunol sa iyang tuong kamot ngadto sa dalaga alang sa pagpakiglamano. “Allan Delfino.”
Mikunot ang agtang ni Salie samtang gitutokan pag-ayo ang bayhon ni Allan. Wala niya tuyoa nga misurok ang iyang dugo nga nagtan-aw sa lalaki. Nahinumdoman niya ang nahitabong pagkaungkag sa ilang pamilya. Ang kamatayon sa iyang inahan ug igsoon pulos lalaki ang hinungdan. Apan gidawat niya ang kamot sa lalaki bisan nagdugo ang iyang ginhawaan. Gipugos niya ang iyang kaugalingon pagpahiyom. Ug nakangislo siya sa dihang gipisil ni Allan ang iyang palad.
Si Allan nga kaha nakamatikod sa pagkulismaot sa iyang nawong, nangayo og pasaylo kaniya. Apan wala na kini niya tagda.
“Siya na ang imong kauban kanunay, Miss Valle,” miingon ang ilang editor.
Misamot pagkulismaot ang dagway ni Salie sa gisulti sa editor.
“Adto na kami, Chief,” nanamilit dayon si Salie ug wala na magpaabot sa tubag sa editor, mipadayugdog siya paggawas nga wala lang agdaha si Allan nga sila manglakaw na.
Nakapangalot si Allan sa iyang ulo bisan wala’y katol. Wala pa siya masayod sa kinaiya sa dalaga. Nahikatawa si Mr. Suarez ug gipikpik niini ang iyang abaga. -- Sumpayan pa