Video Karaoke

Gula

Mibunok g’yud pag-ayo ang kusug nga uwan. Gipahimudsan ni Terio ang kabugnaw sa panahon, nangamoral siya pag-ayo kang Pinky. Gipasabot ni Pinky si Terio nga dili sila angay nga magdali-dali kay bag-o pa silang nagkaila.

Apan wala g’yud mohunong si Terio. Nasabot usab niya nga may pagtan-aw kaniya si Pinky apan nagpadiki-diki lang kini pagdawat dayon sa iyang gihalad nga gugma.

Nakahuna-huna si Terio og paagi. Nagpatoo siya nga naguol ug nananghid nga mopauli na taliwala sa kusug nga pagbunok sa uwan. Gihawiran siya ni Pinky apan nagpatoo nga dili gayud magpapugong.

“Walay kapuslanan ang akong pagpabilin dinhi Pinky kay dili man nimo dawaton ang akong gugma,” ni Terio sa kalma nga tingog.

Mitutok kaniya si Pinky. Dayon mitambo si Pinky sa bentana ug diha pa niya masayri nga naglunop na diay sa ilang nahimutangan kay misugwak na usab ang sapa sa T. Padilla.

“Hala, naglunop na g’yud sa gawas Ter,” giingnan ni Pinky ang ulitawo. “Walay problema, ubogon nako ang tubig kay dili pa man kaha ko nimo sugton karon,” ni Terio pa.

Mipahiyom ang dalaga. “Sigi uy, gisugot na tika Ter,” matud ni Pinky. Nahasinggit si Terio sa kalipay. Gigakus niya si Pinky ug gihagkan. “Salamat, salamat kaayo Pinky nga wala ko nimo pakyasa.”

“Unya mopauli ka na?” nagngisi si Pinky nga misukna kang Terio. Pabiling gigakus gihapon ni Terio ang dalaga. Lumoy kaayo ang lawas ni Pinky nga nagakus ni Terio. Gitagbaw nila ang ilang kaugalingon sa pagparayganay sanglit walay makatugaw kanila.

Misalig si Pinky kay nakasiguro siya nga tungod sa paglunop sa ilang nahimutangan dili dayon makapauli ang iyang maguwang nga lalaki. Hangtud nga daw pareho sila nga giganoy sa kalalim sa pagparayganay.

Gipahigda ni Terio si Pinky sa kotson nga lingkoranan samtang padayon kini niya nga giromansa. Nagpanghiram na ang mga kamot ni Terio sa kalawasan sa dalaga ug maoy nakaganoy pa g’yud sa dalaga sa limbo sa kahinam.

“Pinky, dili ba kaha kita maabtan sa imong maguwang ug mga ginikanan dinhi,” gisukna ni Terio ang dalaga. “Dili pa kadto mopauli karon kay lawom pa ang tubig,” matud ni Pinky.

Mipaspas ang gininhawa ni Terio kay daw gisanapan na siya sa grabeng kahinam sa pagromansa niya kang Pinky.

“Balhin ta sa imong kwarto Pinky, tana,” giagni ni Terio ang dalaga samtang giabagan niya kini nga makatindog sa gihigdaan niini nga sopa. (Sumpayan)