Mata sa Kasingkasing

Gula 6

Labihang lipaya ni Angeline. Naglaom siya nga ang tanyag ni Walter Toews nga patunghaon siya sa kolehiyo mao ang ganghaan sa katumanan sa iyang mga pangandoy sa kinabuhi.

Tuod man, dihang mibalik si Walter Toews uban ang pamilya niini sa ilang dapit ug nagpahigayon og Bible study gisuginlan niya ang misyonaryo nga misugot ang iyang mga ginikanan mahitungod sa gi-offer niini kaniya.

“Good,” nagkanayon si Walter Toews.

Ug niana dayong adlawa mikuyog na si Angeline sa magtiayong Amerikanhon ngadto sa ilang mission house sa Carmen, Bohol.

Kadali rang naka-adjust si Angeline sa iyang buluhaton sa mission house. Ang iyang trabaho mao ang pagpanglimpyo sa sulod ug gawas sa balay. Ang asawa man ni Walter Toews ang mangunay pagpangluto sa ilang pagkaon. Lain usab ang maglaba sa ilang mga sapot nga moanha lang sa balay kun tawagan na sa magtiayon.

Nalingaw usab si Angeline kay may mga higayon nga mosuroy sila sa lain-laing dapit sa lalawigan sa Bohol aron sa pagpanghatag og mga basahon mahitungod sa relihiyon. -- Sumpayan pa