Artikulo Kalig-on diha sa trahedya

Ang mga Pilipino gisaway pag-ayo gumikan sa iyang bati nga imahe. Sama pananglit sa atong imahe isip exporter og mga katabang sa Hong Kong, exporter og skilled laborers sa Middle East ug exporter og Japayuki sa Japan.

Apan bisan pa niining ilang pagpanghimaraot sa mga Pilipino taas gihapon ang akong pagtahod kanila. Tungod kay ang Pilipino kasaligan gayod ilabi na sa mga panahon sa trahedya. Diha sa trahedya imong makita ang kalumo sa balatian sa mga Pilipino.

Ang trahedya nga nahitabo sa Cagayan de Oro, Iligan ug Negros Oriental grabe. Apan gumikan sa matinabangon nga mga kamot sa mga Pilipino ang trahedya nahimong mas masayon sa mga biktima.

Gumikan sa trahedya sa maong dapit usa sa mga sakop sa armadong kusog sa Pilipinas nihukom nga dili na lang mag-party kay ang budget gamiton na lang aron sa pag-ayuda sa mga biktima sa bagyong “Sendong”. Mao sab kini ang gibuhat sa mga kapolisan dinhi sa Sugbo nga inay mag-party, ang salapi nga gamiton sa ilang paghudyaka gamiton aron itabang sa mga biktima sa bagyong Sendong.