“Nakasabot ako nga naapektohan ka pag-ayo sa nahitabo,” mipadayon ang editor nga ligdong kaayo ang nawong. “Apan hangyoon ko lang ka nga ayaw pasagdi ang imong trabaho.”
Miduko si Salie, nagpadayon sa pagpakahilom. Nasayod na siya sa patakaran sa ilang editor. Basta trabaho, trabaho gayod. Dili angay maapektohan sa personal ang trabaho.
“All the time ang trabaho sa usa ka journalist, Salie,” mipahinumdom si Mr. Suarez. “Kada-adlaw kinahanglang may makitang bag-o ang mga magbabasa tungod kay kun magbalikbalik lang ang atong idulot ngadto kanila, motagam sila pagpalit sa atong mantalaan ug hayan mahanaw ang sirkulasyon niini kun kanunay lang nga ingon niini ang mahitabo.”
“Sagdi lang, Chief kay tarongon na nako ang akong trabaho,” mipasalig si Salie.
“Salamat, Miss Valle, nga nakasabot ka,” nahimuot ang editor.
“Hatagan ko ikaw og balita nga may gibug-aton ug takos hinuktokan.”
“Kanang dili magduka ang magbabasa,” dugtong sa lagas.
“Oo, Chief.”
“Sugdi na kini karon, Miss Valle,” miingon ang editor.
Miigot ang palid sa pultahan ug hapit sila magkadungan paglingi. Misugat sa ilang panan-aw ang usa ka taason nga lalaki nga maoy pagsulod sa pultahan. Mihinay kini’g paduol kanila. Dihang nagkaatubangay sila si Salie, nakita sa dalaga nga guwapo kini ug may hiyas nga takos sa pagdalayeg sa usa ka babaye.
“Tuod diay,” miingon si Editor Suarez. “Ipailaila ko ikaw sa atong bag-ong photographer.” Mipasiplat ang editor sa lalaki nga bag-o lang misulod. “Siya si Allan, Allan, siya si Salie, usa sa staff member dinhi.” -- Sumpayan paGula 2