Mata sa Kasingkasing

Gula 5

Pagkasunod semana, mibalik ang misyonaryo sa ilang dapit. Human sa Bible study nga gipasiugdahan niini, nakigsulti si Walter Toews kaniya. Gitanyagan siya niini og trabaho isip katabang niini sa panimalay. Nindot ang offer kay gawas nga maayo ang suweldo gipasaligan usab siya sa misyonaryo nga patunghaon sa kolehiyo sa sunod tuig nga tingtungha.

Discuss it with your parents,” nagkanayon si Walter.

“I’ll talk to them,” tubag ni Angeline.

Tuod man gipakigsultihan gilayon ni Angeline ang iyang mga ginikanan mahitungod sa gitanyag ni Walter Toews kaniya.

“Higayon ko na kini, Tay,” giingnan ni Angeline ang iyang amahan. “Nangandoy ko nga maka-eskuyla sa kolehiyo busa dili nako palabyon ang higayon.”

“Nakasabot ko sa imong tumong, Anak,” nagkanayon ang iyang amahan. “Way problema nako. Ambot lang kaha sa imong inahan.”

“Wa ko’y pagsupak sa imong tumong, Anak,” matud pa usab sa iyang inahan. “Pareho kami ni Tatay mo. Total, alang ra man kini sa imong kaugmaon. Sa imong kaayohan.” -- Sumpayan pa