Bunga sa kaignorante

Nidagsang ining bulana ang libu ka libu ka mga tawo sa Isla Asul. Tungod kay nia dinhi ang sentro sa kulto nga gingalan og Philippine Heavenly Mission. Pinangulohan kini ni Pastor General Elmo Englatera. Naggikan ang mga tawo sa lainlaing mga probinsiya ug mga isla sa Pilipinas. Sulod niining bulana matapos na ang kalibutan.

Mao ni dakong gikahadlokan ni Rodin, ulitawo, 17 anyos ang edad.

“Kadali ba sab matapos sa kalibutan?! Wa pa koy uyab. Wa pa ko katilaw og langit. Pastilan!” tuaw niya sa hilom.

Ang iyang mga ginikanan nga sila si Numer ug Dina mga sakop sa maong kulto. Lumad sila nga taga Isla Asul. Bugtong anak si Rodin ug nakahuman na’g hayskul. Gusto unta siyang moeskuyla og kurso sa kolehiyo. Apan nibalibad sila.Kay matapos na ang tanan.

Naglibog si Rodin.

“Nganong matapos man ang kalibutan, Pa?” nangutana siya ni Numer, usa ka buntag nga nag-abot sila’s ilang tugkaran. “Dunay mahulog gikan sa langit. Kun motugpa’s dagat, magtsunami. Kun sa yuta, maglinog. Magun-ob na ang kalibutan,” ni Numer.

“Kinsa may nagbalita nimo ana?” ni Rodin.

“Si Pastor Englatera,” tubag sa amahan.

“Giunsa man pagkahibawo ni pastor?” ni Rodin. “Gilamdagan siya’s kaalam gikan sa langit,” ni Numer.

“Kun mao na, wa man lagi siya kahibawo nga kun magpunsisok ang mga tawo ning gamay nga isla, modagsang ang mga sakit. Labi na nga wa niya hatagi ang mga tawo og tarong puy-anan. Wa sila’y mga kasilyas ug kaligoanan,” ni Rodin.

“Shhh! Ayaw’g saba!” ni Numer, nanuyo sa anak. Way di mahadlok sa pastor. Kay gamhanan man siya.

Ang mga tawong nilalin dinhi sa isla, di na mamalik sa ila. Gipamaligya nila tanan nilang mga kabtangan. Ug ang mga halin ilang gihatag sa pastor. Halad kuno sa Diyos. Kay inig ka gun-ob na sa kalibutan, ang Isla Asul ray mahibilin. Ug sila ang mga bag-ong tawo.

Nidagsang sa isla ang mga sakit sama sa kolera, el tor, dengue, kalibang, TB ug uban pang makamatay nga mga sakit. Sama sa Mactan ang gidak-on sa maong isla. Si Pastor Englatera dunay palasyo tupad sa dakong simbahan. Dunay hugpaanan sa abyon duol sa simbahan. Ang pastor ray duna’y private jet ug private helicopter. Daghan siya’g mga armadong guwardiya. Maoy nakagamahanan niya.

Daghang nangamatay sa epidemya. Lakip na ang mga ginikanan ni Rodin. Way kabutangan sa iyang kaguol ug kalagot. Sayod siya nga mga ignorante iyang mga ginikanan. Apan wa siya’y mahimo kay anak lang siya. Wa pa gyud natapos ang kalibutan. Apan alang niya natapos na. Wa na siya’y mga ginikanan nga mahimong inspirasyon niya sa kinabuhi. Nagsingabut gihapon ang daghan pang mga tawo. Nahadlok si Rodin nga siya na say masakit. Gikuha niya ang diyutay’ng salaping hiniposan sa iyang mga ginikanan. Gisulod niya’s malita ang iyang mga sinina ug mga gamit nga igong madala niya. Nisakay siya’g barko padulong sa Cebu. Nakahukom siyang manimpalad nga makakita og trabaho. Naglaraw siyang moeskuyla isip self-supporting student. Kon matapos man kaha gyud ang kalibutan, bahala na. Total, wa na man siya’y kawid-an sa kinabuhi. Nakasulod siya’g trabaho. Kay daghang nabakante tungod sa pagpamauli sa mga trabahante sa kahadlok nga matapos ang kalibutan. Nadawat siyang mensahero sa Jet Forwarders. Nakabasa sab siya’g balita nga ang umaabot nga mahulog gikan sa langit, satellite nga ginganlan og Skylab. Setenta y otso toniladas ang gibug-aton. Inig dapat sa kahanginan sa kalibutan, masunog ug mabungkag kini. Mohugpa kini sa Indian Ocean.

Paghugpa sa Skylab, way linog ni tsunami. Tuig 1979 kadto.

Dangta’g upat ka tuig, nigradwar si Robin og BSMT.Gibati siya’g kasubo kay wa siya’y mga ginikanan nga ikasalo sa selebrasyon. Niambos nalang siya’s mga higala.

Nakasakay siya isip agregawo sa m/v Toledo City. Nabasa ni Rodin ang sertipiko sa barko. Dunay gross tonnage ang barko nga sitesentos toniladas. Nipanaw sa dagat ang bapor, way tsunami. Labi pang way mahimong tsunami ang 78 toniladas nga Skylab.

“Ang nanghitabo sa mga sakop sa kulto, bunga lang sa ilang kaignorante,” tuaw ni Rodin. (Katapusan)