Gahi pa diay sa batikulon sa manok

Ako baya ang maluoy kanimo Oprit nga magpakasal ka ni Lolo Igong karong umaabot nga adlaw’ng Sabado?” ni Uray Imak pa nga nabalaka.

“Mangihi na lang gud na sa purol nga way kalibutan si Lolo Igong gumikan sa pagkatiguwang?”

Bisan tuod og taudtaod na nga nabiyuda si Uray Imak kang anhing Ingko Pikto, kun siya pa ang gikursonadahan og panguyab seguro gayod nga iyang despatsahon og balibad.

“Wa ug wa gayod ako makasabot sa akong kaugalingon Nay Imak kun ngano nga maluoy gayod ako kang Lolo Igong?” ni Oprit pa nga namahayag sa iyang inahan.

“Bisan tuod usa na ako ka dalagang guwang ning atong balangay sa Lantawan wa ko igsapayan nga mga maguwang pa diay nako ang umaabot kong kaminyoan!”

“Imo na kanang problema Oprit, kun ngano nga mi-suicide ka og pakigminyo nianang giango-ango na sa pagkatiguwang?” dihay sagol biaybiay sa inahan ni Oprit.

Halawom nga gabii kadto. Nagsibaw ang balita sa radyo nga adunay umaabot nga makusog nga bagyong Jolina.

Sayong nahitagpilaw ang inahan ug anak sulod sa ilang sibay. Ang matag huros gikan sa laag nga hinuyohoy maoy nakapasamot og hinanok ni Uray Imak ug ni Oprit.

Hilabihan kangitngit ang palibot sulod sa may sibay. Unsaon nag-brownout man ang sugang dagitabnon sa VECO.

Apan naunsa bang hitaboa nga diha may migakos sa hawak ni Uray Imak? Mangayo unta og pakitabang ang inahan ni Oprit nga adunay tawo nga nangamang. Apan wa na siya makasinggit kay ingon man hinuon siya nga giganahan?

 Ang nagbuy-od nga kahilom maoy mipatigbabaw, gawas sa inudhak ug daghong ni Uray Imak. Mao na lamang ang iyang naalinggatan ang baho gikan sa inalisngaw sa baba ni Lolo Igong sa iyang tabako.

“Nganong gibuhat mo kini kanako Lolo Igong? Ngano?” nagkayuring ang sinultihan ni Uray Imak.

“Pasayloa intawon ako Imak nga nasaypan ko ikaw kay gipakaingon ko man god og ikaw si Oprit?” sagol kanguhal ang tingog ni Lolo Igong.

“Ako ray bahala ... Lolo Igong nga dili kini mahibaw-an ni Oprit kay basin dili mahinayon ang umaabot ninyong kasal karong Sabado!” ni Uray Imak pa nga wa na gayod mamuhi pa og gakos sa hawak ni Lolo Igong.

“Bilyako ka sa tanang bilyako Lolo Igong, nga magpaluyaluya ka tan-awon ... diay gahi pa sa batikulon sa manok ang nahuptan mong armas!” (Kataposan)