Gula 9
Mihunong ang pari sa makadiyot. Iyang gipasuroy ang iyang mga mata ngadto sa tanang manimbahay.
“May mga kahimtang usab nga ang ginikanan mismo maoy hinungdan kun nganong napakyas siya sa pagsunod sa iyang anak sa dalan nga buot niya nga subayon niini,” misumpay ang pari. Kun ang pagsunod dili ipahimutang sa husto nga lugar, aduna gyu’y motukol. Kinahanglan nga ang ginikanan mahimong panig-ingnan sa tanang maayong buhat aron makita sa anak nga siya takos tahoron ug sundon ang iyang kabubut-on. Mahitabo usab kini tali sa pangulo sa usa ka pundok o kalihokan ug sa iyang mga sakop...”
Hangtod sa pag-abot sa panahon sa pagpangalawat, namilit pa sa hunahuna ni Pepe ang giwali sa pari. May mensahe ang homiliya nga nakatandog sa iyang kaugalingon. May nagkulob nga kamatuoran nga gihayang sa ebanghelyo. Mituhop pag-ayo sa iyang tanlag ang matag pulong nga nangambak gikan sa baba sa alagad sa Dios. Iyang nabatyagan nga may bahin sa iyang kinabuhi nga naukab sa wali ni Padre Giovani.
Human sa misa, namauli gilayon sila si Pepe. Si Rose nagdalidali’g hikay sa ilang paniudto. Sila si Che-che ug Joel nanan-aw og salida sa telebisyon didto sa sala. Si Pepe nag-andam og pasaw alang sa ilang anay. Namasin siya nga gigusla na karon ang mananap ug mokaon na kini sa pasaw nga iyang idulot. -- Sumpayan pa