Suhi

Gula 8

Sa ikaupat nga talay sa mga lingkoranan mipahimutang sila si Pepe. Katupad niya sa paglingkod si Rose. Tupad kang Rose si Che-che ug dayon si Joel. Sa hilom nangindahay si Pepe nga unta kauban nila si Ramil karon dinhi sa balay sa Ginoo. Nindot unta kaayo.

Maduloton nga namati si Pepe sa homiliya ni Padre Giovani. Mihatag ang pari og hubit sa gibasa sa ebanghelyo bahin sa pasumbingay ni Ginoong Jesus mahitungod sa usa ka anak nga mausikon. Undanon ang wali sa pari. Makahinuklog.

“Managlahi ang kinaiya sa tawo,” nagkanayon ang pari nga nagbarog duol sa may pulpito. “May masupilon ug may masinugtanon. Kini dayag nga makita sa mga ginikanan diha sa taras sa ilang mga anak. Bisan unsa ka maayong mopasunod sa usa ka ginikanan, dili kini garantiya nga mapasunod niya ang tanan niyang mga sakop sa banay. Aduna gayo’y motipas, adunay morebelde. Sama sa estorya sa atong ebanghelyo karong buntaga, makita nato ang dakong kalainan sa kinaiya sa duha ka anak. Samtang ang usa buotan ug masunoron sa amahan, ang lain gustong magpaharuhay lang kanunay. Iyang giusik-usikan ang iyang pahat sa katigayonan sa iyang amahan pinaagi sa kahilayan. Apan ang hunahuna sa tawo dili sama sa buko sa kawayan. Dihang nahurot na ang iyang salapi sa pagwaldas, inanay siyang nakasinati og kalisod. Mao pa siya makaamgo nga nagkinahanglan diay siya sa usa ka amahan nga mapinanggaon. -- Sumpayan pa