Natawo ang gugma sa Pasko

Sa sulod sa delivery room sa ospital sa lungsod sa Sogod, mitiliis ang uha sa puya nga bag-ong natawo. Samtang sa gawas, nagpakapaka ang rebentador ug ubang matang sa pabuto. Ug sa kawanangan, mihayag ang lainlaing bulok sa pabuto nga mialibwag sa langit. Ug sa simbahan, kusog nga gibagting ang kampana.

Disyembre 25 na. Pasko na gayod. Naghudyaka ang mga tawo sa kalipay, nga naghandom sa pagkatawo ni Jesus sa pasongan.

“Merry Christmas, Estrella.”

Gilingi ni Estrella ang inahan, si Nang Mildred. Gipagawas na si Estrella sa delivery room sa ospital. Naghigda na siya sa ward. Luya pa siya. Bag-o pa siyang nanganak.

“Maayong Pasko sab, Ma.” Mibathay ang nipis nga pahiyom ni Estrella sa luspad pa niyang mga ngabil. Pinugos ang iyang pahiyom. Si Gerald, iyang bana ang iyang gihunahuna.

“Liwat kaayo nimo ang imong anak, Estrella. Babaye.”

Gilingi ni Estrella ang iyang anak nga giputos sa lampin ug natulog sa iyang tupad. Naitlib niya ang ubos niyang ngabil. Ang ilong ug baba sa bata naliwat kang Gerald.

Si Papa Ramon, Ma?”

“Nanimba. Siya ra ang tua sa simbahan kay nia man ko nga nagbantay nimo dinhi sa ospital.” Gipahiyoman ni Nang Mildred ang anak. Buot siyang madasig si Estrella. Nasayod siya nga naguol ang iyang anak tungod sa pagbiya ni Gerald napulo ka bulan na. Bugtong anak si Estrella.

Mipiyong si Estrella. Gihandom ang nangagi. Sa sinugdan human sa ilang kasal ni Gerald, malipayon kaayo sila. Apan nausab ang tinagdan ni Gerald kaniya dihang miabot og lima ka tuig ang ilang panagpuyo ug wala gyod sila makabaton og anak.

Nagpahiling sila og doktor. Nasayran nila nga walay usa kanila nga adunay depekto. Busa, nahibalik ang naandang pagtagad sa iyang bana kaniya. Milabay pa ang laing usa ka tuig, wala gihapon sila makabaton og anak. Hangtod nga gibiyaan na gayod siya sa iyang bana. Gikaguol kaayo ni Estrella ang gibuhat ni Gerald apan gisabot niya kini. Gihigugma niya kaayo ang iyang bana. Dili siya makahimo nga kasilagan kini.

Apan usa ka bulan sukad sa pagbiya ni Gerald, nagsabak siya. Gikalipay kaayo niya kini ug gusto niyang sultihan ang iyang bana nga mabdos na siya. Apan wala siya masayod kun hain si Gerald. Ang iyang nasayran nga migawas kini sa gitrabahoang kompaniya. Hinuon, dali rang makakita og trabaho ang bana kay engineer man kini.

Nanghupaw si Estrella human mahandom ang kagahapon.

“Katulog na, Estrella, aron mobalik dayon ang imong kalagsik.”

“Oo, Ma.”

Buntag na kaayo sa pagmata ni Estrella. Nahinanok siya pag-ayo sa pagkatulog. Naniga ang iyang mga mata pagkakita sa tawo nga nag-apong kaniya. Nagpahiyom kini kaniya. Milumpayat sa kalipay ang iyang kasingksaing.

“Maayong Pasko, Estrella!”

“M-Merry Christmas sab, Gerald.”

“Dunay nagbalita kanako nga nanganak ka na sa atong anak. Usa ka buwan sukad sa akong pagbiya nimo, mimabdos ka diay. Sa siyudad ra ko nagpuyo, mibalhin sa trabaho sa laing kompaniya. Sukad karon, matibuok na ang atong pamilya uban sa atong anak.”

Madasigon si Estrella. Kanindot sa iyang pinaskohan. (Kataposan)