Silent admirer

Gula 4

Wala danti og dugay, nahiabot si Bert sa iyang gipuy-an sa Barangay Lahug.

Naligo usa siya ug dayon gibuksan ang iyang nadawat nga gifts gikan sa magtiayong Loot ug sa uyoan ni Karlyn. Giinitan si Bert sa iyang lawas kay daghan ang iyang nainom nga wine ug Bahalina nga giipis g'yud mismo ni General Loot.

Nahukman ni Bert nga mag-brief lang nga matulog aron bugnaw ang iyang pamati. Dali ra siya nga nakatagpilaw dihang kalit lang mitingog ang call alert sa iyang cellphone nga gibutang sa ibabaw sa lamesa.

Kabukhonon-dili ang mga mata ni Bert apan gipugos niya kini aron tan-awon kinsa ang mitugaw sa iya na untang katulogon. Si Karlyn diay ang mitawag kaniya mao nga abtik kaayo nga gipislit niya ang accept button.

"Natulog ka na ba Bert? Nakahasol ba nimo?" pangbukas nga pangutana ni Karlyn nga pwerteng lambinga og tingog. "No problem Karlyn, basta ikaw ang mopukaw nako, anytime."

"Wala pa man gu'y tungang gabii Bert, nangimbitar ang duha nako ka close friends nga paapason ko sa Ayala Terraces… magpauban unta ko nimo Bert," matud ni Karlyn.

Wala dayon makatingog si Bert apan sa ngadto-ngadto nahukman niya nga tumanan si Karlyn. "Sigi, unya asa man ta magkita?" matud ni Bert. "Adto na lang sa Ayala Terraces ta magkita mga half hour from now," ni Karlyn pa.

Nag-ilis si Bert ug dali kaayo nga nakagawas, dayon miangkas sa iyang motorsiklo. Wala pay tunga sa oras didto na siya sa ilang gikasabotan. May taksi nga mihunong ug si Karlyn g'yud ang miabot.

"Thanks Bert nga wala ko nimo pakyasa. Tana tua sila sa taas naghuwat. Ako baya silang giingnan nga ikaw ang akong boyfriend, ayaw la'g palag ha?" ni Karlyn pa nga nakapahingangha sa ulitawo.

Mao diay'ng gidala si Bert ni Karlyn kay ang iyang duha ka higala dunay tagsa-tagsa ka boyfriend.

Nakahigayon si Bert sa pagpangutana ni Karlyn pinaagi sa paghagawhaw kaniya dihang nagsultihanay ang duha nila ka kauban.

"Nganong ako may imong gidala Karlyn, ang imo unta nga boyfriend pareho sa imong duha ka barkada," nangutana si Bert. "Zero lagi ko karon Bert. Gibuwagan nako ang akong boyfriend kay grabe kaseloso.

Nakahuna-huna si Bert nga iyang komedyahan si Karlyn. "Kuyawan man gud ko Karlyn nga kun magsigi ta'g kuyog, makat-on ko pagmahal nimo, di ka ra ba g'yud mosugot," ni Bert pa. (Sumpayan)