Usa ka Adlaw sa Tuig 2050 - Gula 3

Si Propesor Armstrong usa ka espesyalista sa pag-estalar sa bomba ug sa paghimo sa mga modernong hinagiban nga tag-as og kalibre sa Acerima. Eksperto siyang imbentor nga maoy nakadiskubre sa pormula sa labing makuyaw ug moderno nga nuclear weapons. Kanunay abante ang iyang panud-ong sa siyensiya ug teknolohiya.

Ang kaalam ug kait-on ni Propesor Armstrong nakapahimo kaniyang daotan. Gigamit niya ang iyang kahibalo sa daotan nga paagi. Nahimo siyang terorista. Buot siyang ilhon nga labing maayong laki sa modernong kalibotan sa mga kompyuter.

Misantop sa hunahuna ni Propesor Jack Armstrong ang paggamit sa iyang kaalam sa pagpanimalos kang Presidente Gil Best. Gimugna niya si R-7007. Lahi kini sa tanang mga robot nga namugna sa laing mga tawo nga batid sa siyensiya. Ang maong robot makahimo sa pag-usab sa iyang kaugalingon sa bisan unsang porma o bayhon pinaagi sa multi-purpose remote control nga iyang giandam alang niini. Iyang gisangkapan si R-7007 sa labing gamhanang hinagiban. Gitahasan niya ang robot sa pagpulpog sa palasyo nga gipuy-an sa pamuno sa nasod sa Acerima. -- Sumpayan pa