Silent admirer - Gula 3

Misuway’g balibad si Bert apan namugos g’yud si Karlyn. “Sigi na gud Bert, please I’ll wait ha?” paraygon ang tono sa tingog sa dalaga.

Naghinuktok makadiyot si Bert apan naabot sa iyang huna-huna nga uyonan si Karlyn sa iyang pagdapit kaniya. Gibalik niya ang nahimutangan sa balay nga gipanag-iya sa Tiyo ug Tiya ni Karlyn.

Wala tuod siya mosipyat kay diha g’yud si Karlyn sa gawas nagpaabot kaniya. Nagsul-ob na kini og lahi nga sapot kay sa gisul-ob niini atul sa ilang panagkita kaganina.

“Salamat nga wala ko nimo balibari. Tana adto ta sa lawn sa luyo kay tua sila si Tiyo ug Tiya,” gigunitan ni Karlyn ang kamot ni Bert. Dili kaayo daghan ang mga tawo didto sa lawn.

“Mga kawani sila sa hardware ni Tiyo kadtong tua sa atbang ug kining anaa manglingkod sa kilid sa swimming pool, mga kawani sila sa pawnshop sa akong uyoan,” ni Karlyn pa.

Giduol nila ang Tiyo ug Tiya ni Karlyn nga naglingkud dapit sa atubangan nga nagpahiyom samtang sila nagdanga-danga sa ilang nahimutangan.

“Mao ni si Bert, Tiyo, Tiya, kulumnista siya sa mantalaan nga inyong kanunay gibasa ang iyang opinyon. Bisita siya nila ni General Loot ug Mayor Loot diha sa unahan ug nakit-an nako nga wala dayon makatultol sa iyang adtoan,” matud ni Karlyn.

Gilamano si Bert sa uyoan ug iyaan ni Karlyn. “Sigi ikaw na ang mahibawo kaniya Karlyn. Ihatag kaniya ang usa nianang gift pack nga anaa sa ibabaw sa lamesa,” giingnan si Karlyn sa iyang iyaan.

Si Karlyn maoy miabi-abi kang Bert. Nagkuyog sila pagkuha og pagkaon, dayon nagtupad sa paglingkod. “Gusto g’yud unta ko nga mahisama nimo Bert nga usa ka magsusuwat sa mantalaan, pwede ba ako nimo nga matudloan?”

“Sure.. malipay ko pananglit gusto ka nga mahisama kanamo nga mga journalist, apan mao lagi, gagmay’ng sweldo ug maoy magpasuwabe ang public service,” matud ni Bert.

Nasuod sila kaayo nga bisan usa ka gabii pa lang sila nga nagkaila, daw ikatumbas sa katuigan na sila nga nagkaila. Miabot ang oras nga mopauli na g’yud si Bert.

“Sigi Bert, babay. Ingat ha?” pahimangno ni Karlyn sa ulitawo sa dayon na niining padagan sa iyang motor. Samtang nagdagan ang motorsiklo ni Bert, wala mahanaw sa iyang huna-huna si Karlyn. (Sumpayan)