Silent admirer

Gula 2

Mideritso pagduol si Bert sa lamesa diin didto maglingkod ang magtiayong General Vic Loot ug Daanbantayan Mayor Ma Luisa Loot. “Nasaag-saag ko Sir, wala dayon ko makatultol diri sa inyo,” giingnan ni Bert ang namingawan niyang higala. Suod sila nga managhigala si General Loot sukad nga teniente pa ang ranggo niini kaniadto.

Milingkod si Bert uban sa grupo nga diha sa lamesa nga gilingkoran sa magtiayong Loot. Igo lang siya nga naminaw sa gipanagsultian niini kay kabahin man sa politika.

Apan pagkataud-taud, mitingog ang message alert sa cellphone ni Bert. Ngalan ni Karlyn ang mi-appear sa screen. Ingon sa gibati og kalipay ug nasurpresa si Bert kun nganong mi-text kaniya si Karlyn.

 “Happy kaayo ko nagkita ta. Dugay na ko tigbasa sa imong mga opinion sa newspaper mao nga kaila dayon kini nimo pagkakita ganina,” nakatimaan si Bert nga numero kini ni Karlyn.

Sanglit wala man kaayo mosalmot si Bert sa panagsultihanay nga may kalambigitan sa politika sa 4th district diin ang Daanbantayan nasakop, nagkalingaw siya pagpindot-pindot sa cellphone ug gi-replayan si Karlyn.

Gipalamian usab ni Bert si Karlyn sa iyang text message. “Labaw pa kong nalipay sa atong panagkita Karlyn, daw ang imong panagway dili malaksi sa akong kaisipan.”

“Bulatik!” mubo nga reply ni Karlyn.

Nagbawos-bawos ang ilang mga message. Hangtud nga miabot kini sa punto nga gipalabtikan og mga pulong-pagmahal ni Bert ang dalaga. “Dili man sagad nga kun makakita ko’g babaye dili ko makalimot, ngano kaha Lyn?”

Apan wala motubag si Karlyn. Taud-taud, nag-iyahay na og pamauli ang mga bisita sa magtiayong Loot. Walay laing nahimo si Bert, miuban na lang usab siya sa panon.

Mipaingon si Bert sa giparkingan sa iyang motor. Apan sa dayong sakay ni Bert, gikuha niya ang iyang cellphone. “Mopauli na ko Lyn. Human na ang party nga akong gitambongan sa ilang General Loot.”

Gipaandar ni Bert ang makina sa motor, dayon gipadagan paingon sa gate sa village. Apan nabantayan niya nga mitingog ang iyang cellphone nga daw dunay nanawag.

Mihunong si Bert ug gidali’g kuha ang iyang cellphone sa bulsa sa iyang polo shirt. Si Karlyn ang nanawag. “Bert, ari diri sa balay kay party diri, ipaila-ila tika nila ni Tiyo ug Tiya. Tigbasa man sila sa imong opinion.” (Sumpayan)