Usa ka Adlaw sa Tuig 2050

“Kun ang imong kamaalamon magkadako, ang imong suliran magkadaghan; kun ang imong kahibalo magkadako, mosamot ang imong pag-antos.”... Ecclesiastes 1:18

Mao pa gani pagbitak sa silaw sa Adlaw sa subangan sa unang adlaw sa tuig 2050, nag-atubang na si Propesor Jack Armstrong sa monitoring screen nga nahimutang sa iyang tinagong laboratoryo sa Golden Eye. Giduyan siya sa kahinam. Nagpaabot siya sa mahimong resulta sa iyang gisugo kang R-7007, ang labing gamhanan nga robot nga iyang gisangonan sa usa ka dakong misyon.

Nakita niya ang robot nga nagpaingon na sa Gold Palace, ang puloy-anan sa presidente sa Acerima. Nagpanikad na siya sa hilom nga nagpaabot sa sunod nga mahitabo. Wala niya lung-i sa pagsunod ang mga lihok sa robot pinaagi sa monitoring screen nga iyang gitamdan. Duol na ang robot sa palasyo!

Pipila na lang ka gutlo ang iyang paaboton ug mahingpit na ang iyang pagpanimalos kang Presidente Gil Best. Dugay na siyang nagtanom og kasilag sa pamuno sa Acerima. Nagsugod kini niadtong panahon pa sa ilang pagka-tinun-an. Managsama silang utokan apan managlahi ang ilang panud-ong ug baroganan sa kinabuhi. Nagkaatbang sila sa gugma ni Diana, ang labing maanyag nga kolehiyala sa Varhard University. Si Best ang nakaangkon sa gugma ni Diana ug kini gikasakit pag-ayo ni Armstrong. Wala siya makadawat sa iyang kapakyasan sa gugma. -- Sumpayan pa