Balik sa gibiyaan nga kalibotan - Gula 59

Dinhing bahina sa iyang pamalandong nga miburot ang iyang kabalaka. Milugdang sa iyang hunahuna nga posibleng makaabot ang kasundalohan dinhi sa bukid sa Kaandis sa pagpangita sa nahabilin nga mga rebelde. Napaghilantawan na niya ang mahitabo kun mag-abot pag-usab ang duha ka armadong pundok. Matagna kun unsang matanga sa salida ang makita. Butobuto, baha sa dugo ug uban pang maingon-ingon niini nga talan-awon.

Dihay tabil nga nahulog sa iyang kahimatngon. Mialisngaw ang kahiamgo nga lakip siya mameligro kun makaabot ang mga sundalo sa bukid sa Kaandis. Basin lakip siya maangin. Dili na siya gustong mahilambigit sa kasamok ang iyang kinabuhi.

Unsay iyang buhaton? Molikay siya? Mopalayo? Asa siya paingon? Nanguykoy ang iyang kaisipan og tubag sa maong mga pangutana. Nagkinahanglan kini’g dinaliang tubag alang sa kaugalingon niyang kaayohan.

Maoy pag-abot sa kilumkilom. Nangandam si Gener sa iyang kaugalingon. Nanihapon siya’g sayo. Diyotay ray iyang nakaon sa mga lagutmon nga iyang gisugba. Ingon na siya niini sukad pa sa sinugdanan sa panahon. Dili siya mahinultol sa pagkaon kun aduna siya’y daghang hunahunaon.

Misaka siya sa taas sa payag human makakaon. Mihimamat kaniya ang kangiob nga naglublob sa sulod sa payag. Lahi sa gawas nga gidan-agan sa daob nga iyang gihimo sa tugkaran. Apan bisan sa kangitngit, giyano lang niya pagtultol ang haligi nga gisab-ongan sa iyang bag ug sundang. Iyang gitakin ang sundang. Gitakliay ang bag sa iyang abaga. Dayon mibalik siya pagkanaog sa silong.

Mibarog siya sa tugkaran sa payag. Gianinaw ang palibot. Hingpit na nga nahingkod ang kangitngit. Sa iyang kabubut-on mao na kini ang tukmang higayon sa paggikan.

Nakahukom siyang mobiya sa bukid sa Kaandis. Napaghilantawan niya nga ang kalinaw nga gitipigan niining hilan nga kalibotan tugawon sa kagubot sa umaabot nga mga adlaw. Samtang may higayon pa kinahanglang molikay siya. Dili siya buot makasaksi sa panag-unay sa mga tabunon nga managlahi og bahawan. Dili siya buot mapagan sa kagubot. -- Sumpayan pa