Balik sa gibiyaan nga kalibotan

Gula 57

“Gusto kong moapil ka sa among kawsa?” ang tingog sa kumander mora’g gihidhiran og lana nga makapadanglog sa kabubut-on.

Wala siya motingog. Pero ang iyang pagpakahilom dili timaan sa pag-uyon. Ang kaikog sa pagbalibad mikadena sa iyang dila.

“Ang sama kanimo maoy gikinahanglan sa among kalihokan,” kaha nagtuo nga gitay-an ang iyang kabubut-on, gidugangan sa kumander ang paglana sa iyang hunahuna.

“Pasayloa nga dili ko makasanong sa imong awhag,” nakalighot gikan sa iyang mga ngabil ang giugom niyang balibad.

“Sa unsang katarongan?” nakigtagay ang kumander sa iyang baroganan.

“Natapos na ang akong kinabuhi sa kabangis,” giuntop niya ang iyang tubag.

“May mga tawo nga nagkinahanglan kanimo,” buot motupong ang kumander sa kahabog sa gipabarog niyang katarongan.

Gusto na ko’g kalinaw sa kaugalingon,” gisumpayan niya’g katas-on ang kahabog sa iyang katarongan.

Ang kahilom mora’g linalang nga dili makita nga mibarog sa ilang taliwala. Sa karaang kansiyon ug kolokiyal nga mga sugilanon gituohan nga may ginoo nga milabay sa ilang tunga-tunga.

“Nakasabot ko sa inyong tumong,” namulong si Gener human moagi ang Ginoo. “Apan hatagi ko ninyo’g kagawasan. Gusto kong igahin ang kalinaw sa bag-ong kinabuhi.”

“Walay kalinaw sa sulod kun wala’y kalinaw sa gawas,” sa kumander.

“Labaw nang wala’y kalinaw sa gawas kun wala’y kalinaw sa sulod,” dali ra siyang nakabunlot og argumento. “Wala ko makaplagi ang kalinaw sa sulod maong gipangita ko kini sa gawas. Sa higayon nga ako na kining makaplagan, ako kining gakson ug tipigan sa dughan.

Mibalik ang Ginoo ug miagi sa ilang taliwala. Si Gener nagpaningod sa hilom nga sumbalihok sa pangulo sa mga rebelde. Dihay iyang namatngonan. Daw nasuta na sa kumander ang kalig-on sa banting sa iyang baroganan.

“Palihog ayaw ko hukming nasayop sa akong desisyon,” niya pa.

“Nagtuo kong managsama kitang husto sa atong tagsatagsa ka panud-ong.” -- Sumpayan pa