Nagtotok si Atty. Nestor Cortes ni Mr. Ernie Torion nga naglingkod na sa witness stand tungod sa malatrono nga daw bantawan nga gamay diin naglingkod si Judge Lando Robles nga nagsul-ob og toga nga morag sotanang itom. Witness stand man gyuy kasagarang tawag anang lingkuranan sa testigo. Apan puwede sab witness seat o witness chair. Andam na karong buntaga si Mr. Torion sa mga pangutana ni Nestor. Pormal iyang hitsura. Kun ginerbiyos man, di tataw.
Abogado si Nestor ni Mr. Nardo Ruiz nga complainant ining kasoha karon nga gibista sulod ning husgado sa Municipal Trial Court, sa lungsod sa Urbina. Andam na sab si Atty. Roger Into, abogado ni Mr. Torion sa pagpaminaw ni Nestor kun unsay ipangutana sa cross-examination. Naglingkod si Roger atubangan sa taas nga lamesa sulod sa husgado dapit sa wala si Nestor. Alas nuybe i medya na ron, sumala sa wall clock nga gibitay sa bongbong sa walang habig sa husgado. Katapusang kaso ni nga bistahon karong buntaga. Ikanapulo ni sa listahan o calendar sa husgado. Sayong natawag kay na-postpone ang siyam nga kasong nauna sa listahan.
Sa pagkatinood, wa gyud sa kondisyon si Nestor ining bistaha karon. Labad iyang ulo. Mora siya’g hubog gihapon tungod sa hang-over sa niaging gabii nga inom. Init iyang pamati sa iyang lawas kay kulang siya sa tulog. Alas kuwatro sa kaadlawon na siya nakauli. Tulo ra ka oras iyang katulog. Kay grabeng inom ug sing-along niya sa mga barkadang abogado sa niaging gabii. Kay nitambong sila’g Christmas Party sa usa ka dakong kliyente nga korporasyon, sa usa ka abogado. Gisaulog sa Blue Horizon Hotel usa ka dakong hotel and restaurant sa baybayon sa Mactan. Presko lang tan-awon ang hitsura ni Nestor kay naligo siya’g tubig nga sinagulan og ice. Ug maayo lang siyang modalag inartista nga mora’g piskay lang gihapon bisa’g wa sa kondisyon.
Kaso nga Collection of Sum of Money ang giabutang ni Mr. Torion. Nagpa-rediscount siya’g lima ka tseke ni Mr. Ruiz, balor og dos siyentos mil pesos (tag P40,000 kada tseke). Nanguntol tanang tseke. Apan wa kakiha si Mr. Ruiz og kaso nga Violation of BP 22 kay nilapas na ang upat ka tuig gikan sa pag-untol. Upat ka tuig ra man ang gitawag og prescriptive period (panahon sa pagpaso sa kaso) sa BP 22. Apan mahulog man nga utangan si Mr. Torion kang Mr. Ruiz tungod sa mga tseke, kasong civil nalang ang mahimo kay wa pa napaso.
Nindot ra ba unta ang mga planong pangutana ni Nestor kang Mr. Torion. Kay makaprobar gyud si Nestor nga daghang pamakak ang nasulti ni Mr. Torion.
Pero wa gyud sa kondisyon si Nestor. Gusto siyang matulog tibuok adlaw. “Your witness!” pintok nga pulong ni Judge Robles. Kay gilaay sa paghuwat ni Nestor nga dugay nisugod sa iyang pangutana sa cross-examination. “Ah, Your Honor please. In the spirit of Christmas, I would like to declare a ceasefire during the Christmas Season,” ni Nestor dungan ang pagtindog. Nagpahiyom. “I don’t want to destroy the peace of mind of Mr. Torion. My cross-examination would be lengthy and might be stressful to him. So I would rather request for cancellation of today’s hearing. And be allowed to conduct my cross-examination in the next setting next year” dugang ni Nestor. Nagpahiyom gihapon. “Atty. Into. What can you say?” sa huwes. Nitan-aw ni Roger. “I welcome the suggestion of counsel, Your Honor. In fact, the idea also occurred to me. But I was jsut reluctant to make that suggestion,” ni Roger. “It was also on my mind” matud sa huwes. Nagpahiyom. “So, Merry Christmas every one. Session adjourned” sa huwes. Nitindog. Nidukduk sa kahoy nga martilyo sa kahoy nga dukdukanan. “Hatagi sila’g bag-ong petsa sunod tuig” mandar sa huwes sa Interpreter nga si Gary, dayong naug sa rostrum.
Nanaug sa witness stand si Mr. Torion. Nagpahiyom nga nilamano ni Nestor. “Merry Christmas, attorney” ni Mr. Torion. “Merry Christmas” ni Nestor. “Merry Christmas, panyero” ni Roger ngadtong Nestor nga nagtunol sa toong kamot. “Merry Christmas” ni Nestor nga nidawat sa toong kamot sa laing abogado. Wa nitambong si Mr. Ruiz kay humana siya’g sulti.
Wa nagdahom si Nestor nga sa kalabad sa iyang ulo, nakahatag pa siya’g gamay’ng kalipay sa iyang isig ka tawo. (Kataposan) (Sa gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)