Classmate

Gula 5

Daw namalaye si Oscar kang Joy sulod sa tibuok adlaw tungod kay didto ra siya gayampungad uban sa dalaga gikan pa sa buntag hangtud mihapon na lang. Misamot ang ilang kasuod ni Joy.

“Nangimbitar diay ang akong mga amiga sa pikas nga sityo Oscar nga patambungon mi sa ilang bayle. Mouban ka unya?” gisukna ni Joy ang ulitawo. “Sige Dong, ubani si Joy didto sa pikas sityo kay aron duna sa’y makabantay niya,” timang sa inahan ni Joy.

“Walay problema Nang, mopauli usa ko kay aron makailis. Hapiton na lang nako dinhi si Joy,” ni Oscar pa nga mitutok sa dalaga. “Balik dayon ko Joy.”

Pagtalikod na ni Oscar, nagsultihanay ang inahan ug anak. “Nangulitawo ba kanimo si Oscar anak? Tan-aw nako may pagbati siya kanimo,” matud sa inahan ni Joy. “Wala man Ma, gusto lang tingali siya nga masuod kami kay kaklase gud mi sa elementary.”

Nangareglar si Joy sa iyang kaugalingon. Taud-taud, may nangatahuran sa gawas ug nasinati ni Joy nga tingog ni Oscar ang ilang nadungog. “Dayon usa Dong, naa pa sa kwarto si Joy,” nadungog ni Joy ang tingog sa iyang inahan.

Migawas sa kwarto si Joy ug nakita niya si Oscar nga diha na sa sala. “Uy, kagwapa! Angayan ka kaayo sa imong gisul-ob Joy,” wala makapugong ang ulitawo pagdayeg ni Joy. “Ikaw ‘sab angayan kaayo sa imong gisul-ob.”

“Pag-ayo-ayo mo didto Joy, Dong Oscar ikaw na ang mahibalo ni Joy ug ayaw kaayo mo pagpakadlawon ha,” matud sa inahan ni Joy sa dayon nilang lakaw.

Ingon sa maghigugmaay na gayud sila si Joy ug Oscar bisan og nga wala pa siya makapangulitawo sa dalaga. Giagbayan ni Oscar si Joy dihang didto na sila sa mingaw nga lugar. Wala mopalag ang dalaga sa iyang pag-agbay.

“Joy malipayon kaayo ko nga dinhi magbakasyon atol sa Pasko. Maayo unta og duna ko’y nindot kaayo nga pinaskohan gikan kanimo Joy,” matud ni Oscar. “Ha? Unsa man tawo’y akong mahatag nimo nga pinaskohan uy…pobre man ko Oscar,” dali nga tubag sa dalaga.

Nadungog na nila ang tukar sa baylehan sa sityo nga ilang gipadulngan. Give Love on Christmas Day ang awit nga gipatugtog. “Kanindot unta kun sa dili pa ang Pasko maangkon nako ang tinuoray nga gugma dinhi sa atong baryo Joy,” matud ni Oscar. (Sumpayan)