Gula 99
“Buhii kanang gigunitan mong armas!”
Nahalingi si Brandon. Ug misiga ang iyang mata pagkakita kang Col. Vince Noot ug mga kauban nga pulos nagtion sa ilang mga armas ngadto kaniya. Nakugang siya. Wala siya magdahom nga mahiabot ang mga polis.
“Nabati ko ang tanan nimong gipanulti,” nagkanayon si Col. Noot. “ Igo na kadtong nagmatuod nga ikaw gayod diay ang matuod nga responsable sa paglugos ug pagpatay kang Gemma Roca.”
Wala motingog si Brandon. Naghunahuna siya’g paagi nga makaikyas gikan sa mga tinugyanan sa balaod nga naglibot kaniya.
“Ampo nga malinawon, Brandon Mercado,” awhag ni Col. Noot.”
Apan dili gusto si Brandon nga mabilanggo. Nasayod na siya kun unsa ka bug-at ang iyang kaso kun mosurender siya. Busa nakahukom siyang manabla. Dihadiha gibakyaw niya ang iyang kamot nga naggunit sa armas aron magpataka sa pagpamusil.
Apan may nakauna pagpabuto kay kaniya. Si Jeffrey! Nga gisundan usab sa pagpabuto sa kapolisan. Misayaw si Brandon sa kasakit sa daghang mga bala nga mitusak sa iyang kalawasan. Unya mihagsa siya sa yuta nga wala nay kinabuhi. -- Sumpayan pa