Ang brilyante sa Disyembre

Mapulo, Garing, Consolacion, Cebu. Balikbayan sa Pilipinas si Rodrigo ning nagsingabot nga Pasko. Dugay na siya nga milangyaw didto sa Hawaii. Tungod kay nakasulod man siya didto og maayong trabaho sa usa ka kompaniya sa softdrinks. Sa iyang pagpuyo didto, miasenso gayod siya sa pag-ayo. Dato na si Rodrigo karon.

Timawa kaniadto si Rodrigo didto sa bukid sa Barangay Tagbao. Mag-uuma lamang siya sa yuta nga gipanag-iyahan usab sa usa ka bukidnon nga usa ka adunahan. Ang iyang agalon mao si Attorney Villamor.

May usa ka matahom nga dalaga nga si Lisa. Bisan pa sa katimawa ni Rodrigo nga pagkatawo, kang Lisa gayud siya nangulitawo. Gisugot usab siya sa dalaga nga maestra. Tungod kay nahigugma man usab kaniya ang dalaga.

Pagkasayod ni Attorney Villamor sa relasyon nila ni Lisa ug Rodrigo, nasuko ang dato sa pobre nga ulitawo. Gipakasama siya sa usa ka baboy ug gikasab-an. Diin hilom lang siya bisan hapit na lang siya tulisukon sa mga tudlo niini ang iyang mga mata!

“Pahawa, Rodrigo sa akong yuta! Ayaw na dinhi sa pag-uma! Dili ako buot nga ikaw ang mabana ni Lisa ang anak kong maestra!” ni Attorney Villamor pa, nga naghingilin kaniya.

Sa diha nga naabtan sila sa abogado nga naghinagkanay sa sopa sa ilang sala, giabog kini lakaw na Rodrigo! Aron dili ko ikaw hipusilan ning pistola kong .45! Sukad karon ... dili na ako buot nga makita pa nako ang imong panagway ... dinhi sa harianon kong panimalay! Kaambisyoso god intawon kanimo! Nga gusto maniyakpat sa usa ka anak sa abogado! Pweeee! Giluod uroy ako kanimo Rodrigo! Usa ka ka tawo nga gamay ra kaayo og grado! Unya anak pa gayud sa mga ginikanan nga kakha tuka!” ni Attorney Villamor pa nga nanghimaraot gayud sa pagkatawo ni Rodrigo.

Maoy hinungdan nga si Rodrigo milangyaw didto sa Hawaii kay gidala sa iyang amo nga si Mr. Rolando Villavito. Ang tag-iya sa planta sa ‘softdrinks’ didto sa Hawaii.

Napulo ka tuig si Rodrigo didto sa Hawaii. Tungod kay ulitawo man usab, si Mr. Rolando Villavito namatay kini gumikan sa ‘hayblad’ nga walay kabanay. Busa siya ang nakasunod sa mga katigayonan niini. Sanglit siya man, ang gipiyalan sa planta sa ‘softdrinks’ nga iyang gitrabahoan.

Didot sa Hawaii. Hilom sila si Lisa ug Rodrigo sa ilang mga cellphone nga magtiksanay, walay kasayoran si Attorney Villamor niini kun si Rodrigo ang kanhi usa lamang niya ka saop usa na karon sa bahandianon. Diin labaw na gayod usab kaniya kaadunahan!

Mihunong ang bag-o nga awto, nga napalit ni Rodrigo sa dakbayan sa Sugbo, sa tungod gayud sa harianong balay ni Attorney Villamor. Midagan si Lisa nga misugat kaniya. Diin kalit si Attorney Villamor, nahigangha sa nakita niya. Kay mikabyon man god si Lisa sa liog ni Rodrigo sa paghikanaog niini sa bag-o niyang awto!

“Oh, Rodrigo! Gimingaw na gayud ako kanimo!”

“Mao usab ako Lisa! Gimingaw na gayud kanimo!”

“Uy, Lisa? Trato ba diay gihapon kamo si Rodrigo?”

“Oo, papa! Ang Rodrigo nga imong nakita karon, dili na ang Rodrigo nga mag-uuma kaniadto! Usa na siya karon ka milyonaryo!”

“U-unsaa? S-si R-Rodrigo milyonaryo?”

“Oo, Attorney Villamor!” tubag ni Rodrigo nga nagkatawa. “Aniay singsing brilyante nga akong dala ning Disyembre. Alang kini ni Lisa. Ang imong anak, nga umaabot kong asawa! Ha-ha-haaa!” ni Rodrigo pa nga mibahakhak sa pagkatawa.

“Wowiwiwi! Doble brilyante ring! I love you Rodrigo!” ni Lisa usab nga mipahiyom ug mikatawa sa umaabot niyang bana. Naulaw si Attorney Villamor nga milakaw aron paghatag og higayon sa managhigugmaay nga nagparayganay. (Kataposan)