Paita ning paskoha nako ron uy, napulo na ka tuig ning prisohan apan dugay pa kong makagawas dinhi,” nagpanglingo-lingo si Kolas nga namulong sa hilom ning sayong kabuntagon sulod sa Muntinlupa.
Nabilanggo siya sa kasong pagpatay sa mga kriminal nga mitulis sa iyang tigulang nang inahan nga maayo gani nga nabuhi pa sa mga dinunggaban nga naangkon niya human sa krimen.
Nahibaloan ni Kolas ang mga kriminal gumikan sa pagsulti kaniya samtang nagpaalim kini sa iyang mga samad sa ospital.
Mao tong miadto siya sa Danao ug mipalit og pusil sa iyang amigo.
Pila may estorya, gidungan niya og pamusil sila si Marco, Berto ug Alex samtang naghapi-hapi sila sulod sa usa ka videokehan sa lungsod.
Gibirahan niya ang tulo gumikan sa kalagot niya nga gitulis na ug buot pa gayud nilang patyon ang iyang inahan nga si Inse Talina.
Adunay tindahan sa lungsod ug nagpatanto usab ang naulahi.
Human sa husay, namatud-ang sad-an sa husgado si Kolas ug gisentensiyahan siya og bayente ka tuig nga pagkabilanggo.
Napulo ka tuig sa serbisyo sa iyang sentensiya si Kolas ug nagminatarong siya sa sulod.
Wala siya moapil-apil sa mga grupo o gang sulod sa atob, hinuon kanunay siyang makit-an nga magbasa og Bibliya.
Dihay usa ka higayon nga giagda siya sa grupo ni Peter sa pagtakas, apan hugot niya kining gibalibaran ug giayran.
Kanunay’ng mag-ampo si Kolas ngadto sa Kahitas-an nga unta bisan sa katapusang higayon na lamang magkita siya ug ang iyang inahan sa Sugbo.
“Kolas, paadtoon ka sa opisina sa Warden,” sulti ni Tonyo nga usa sa mga guwardiya.,
“Ngao kaha no? Unsay tuyo kaha ni Sir Waldo,” nakapangutana sa hilom sa iyang kaugalingon si Kolas.
Walay langan, miadto dayon siya sa opisina sa Warden nga daw gilubok og alho ang iyang dughan.
“Dayon Kolas ug lingkod kay may mahinungdanon akong isulti kanimo,” timbaya pa sa Warden sa pagkakita kaniya.
“Salamat Sir. Gipatawag man kuno ko nimo,” sukna pa ni Kolas.
“Oo, ug malipay ka niining balitaa Kolas,” sulti pa sa Warden. Ug mipadayon kini,” kada Pasko, mopagawas og mga piniriso ang Presidente sa Pilipinas isip “parole.”
Daw gibayaw ngadto sa kalangitan si Kolas sa hilabihang kalipay nga dili matukib.
“Isipon ko kini nga usa ka halandumong pinaskohan sa Diyos ngari kanako,” nagkanayon si Kolas.
Busa, kun ang tawo mag-usab sa iyang kinabuhi pinaagi sa pagpaduol ug pagsangpit kanunay sa Diyos, makadawat gyud siya’g grasya nga hulog gikan sa langit sama kang Kolas ning atong sugilanon. (Kataposan)