Pulos minyo

Dear Tita Salie,

Maayong adlaw. Tawga lang ko sa pangalan nga Bong, 50 years of age, ug 10 years na nga buwag sa asawa. Aduna koy uyab karon nga duha ka buok apan pulos minyo. Apan pareho nako buwag na usab sila sa ilang partner.

Kining akong 2 ka mga uyab pulos mga teacher. Ang usa magulang nako og 5 ka tuig, ug ang usa usab manghod siya nako og 8 years. Sila si Mam gusto makigtipon nako. Pero wala sila masayod nga duha sila sa akong kinabuhi. Ang ilang nahibaw-an faithful ko nila.

Mas ganahan ko sa teacher nga manghod nako og 8 years. Wala gyod koy love sa usa. Nakigrelasyon lang ko niya tungod kay gusto lang ko malingaw. Gusto ko nga makigtipon sa usa nga mas manghod nako kay siya gyod ang akong gimahal. Ug uyon usab siya nga magtipon ming duha. Apan gikuyawan man hinuon ko kay nagpadagan man og estorya ang iyang bana nga kun magtipon mi iya ming gukoron. Nahadlok usab ang akong uyab nga tingali og tinud-on sa iyang bana ang iyang bahad.

Wa man sad gyod koy gugma sa usa nako ka uyab god. Wala unta siya’y problema kay aduna na may laing pamilya ang iyang bana. Unsa may akong buhaton, Tita? Palihog tabangi ug pasabta ko. Daghang salamat. -- Bong

* * *

Dear Bong,

Imo ba gyod kining hilig ang manguyab og mga maestra? Kun gusto nimo nga mangasawa pag-usab o adunay kauban sa kinabuhi ayaw i-limit ang imong choices nganha nila ni mam. Aduna pay daghang mga babaye kun mangita ka lang. Ayaw pagpili nianang duha ka teacher kay nasayod ka man nga dili maayo kun imong mapili ang usa kanila. Ayaw sudla ang usa ka matang sa kinabuhi diin nasayod ka nga maglisod ka.

Of course, ayaw pilia ang tawo nga wala nimo higugmaa kay moabot ra gihapon ang panahon nga imong pangitaon ang imong gihigugma. Ug ayaw usab pilia ang tawo nga nahigugma ka apan dili magmalinawon ang imong hunahuna tungod kay adunay laing tawo nga argabyado. Dili magpuyo sa kinabuhi kun wala kay kalinaw sa hunahuna.

Busa, ayaw una pagpili kanila kay dili maayo ang imong pilian. Huwata una nga adunay lain nga moabot sa imong kinabuhi. Pilia ang tawo nga malipayon ug malinawon ang inyong pagpuyo ug walay angay kabalak-an o kaha kahadlokan. -- Tita Salie