Maunongon Ang Gugma - Gula 97

Gipusil ni Brandon si SPO3 Romualdo Genteroy. Mihagba kini sa yuta nga wala nay kinabuhi. Nahitan-aw kang Brandon ang iyang mga sakop, daw dili makatuo sa iyang gibuhat. Apan ingon siya niini, dili magduhaduha sa paghunos og kinabuhi sa tawo.

Ug sa tuman niyang kalagot, gipaulanan niya’g mga bala ang baba sa langob.

Duol na sila si Col. Vince Noot sa dapit nga gitumbok sa ilang asset nga maoy gitagoan nila ni Jeffrey ug Danica sa dihang nakadungog sila’g sagunson nga mga butobuto.

“Pagdali kamo,” giingnan ni Col. Noot ang iyang mga sakop. “Tingalig unsa nay nahitabo kang Jeffrey.”

Miyuhot sila sa bagang kakahoyan. Nagpadayon pa ang mga butobuto sa armas didto sa ibabaw nga bahin sa lasang. Nagdali sila pagpaingon sa maong dapit.

Labihang lagota ni Brandon. Napatay na ni Jeffrey ang tanan niyang mga sakop. Siya na lang ang nahibiling buhi.

“Hayop ka, Jeffrey,” nagpaminti si Brandon.

“Ikaw maoy hayop, Brandon,” mitubag si Jeffrey didto sa sulod sa langob. “Pagabayran mo’g mahal ang gibuhat mo sa akong hinigugma ug sa pagguba mo sa reputasyon sa akong pagkatawo.” -- Sumpayan pa