Dili kaingon

Dear Tita Salie,

Maayong adlaw kanimo, Tita ug kumosta? Ako diay si Jovanie, ulitawo ug dunay naibgan nga usa ka babaye nga maoy naghatag og kadasig sa akong kinabuhi karon.

Duna koy hinigugma, Tita, sulod na sa dugay’ng panahon. Gusto gyod nako kining maong babaye. Minyo siya apan patay na ang iyang bana ug adunay usa ka anak. Apan bisan pa man niini mopatigbabaw gyod ang akong dakong gugma kaniya. Apan ang problema kay dili ko kasulti sa akong gibati ngadto kaniya. Gidaog ko sa akong kahadlok. Mahadlok man gyod ko basin masuko siya kun ako siyang digahan sa akong gugma.

Sukad ra ba nga nakabantay siya nga duna ko’y gusto niya kay mura siya og nausab. Lahi na ang iyang tinagdan ngari nako. Mora og dili na kaayo siya motingog nako. Nasuko kaha siya nako, Tita? Nga nakagusto ko niya? Unsaon man nako siya pag-approach? O dili ko na lang ipadayon ang akong pagbati ngadto kaniya? Palihog pasabta ko, Tita, kay naglibog nako kun unsa ang angayan kong buhaton. Thank you very much and more power. -- Jovanie

* * *

Dear Jovanie,

Adunay giingon nga ang “Quitter is always a loser”. Tinuod kini kun mo-quit ka imposible gyod nga molampos ka. Wala gyod kay makit-an nga niundang unya nilampos. Kay kun mo-surrender ka wala na, nahuman na ug napildi ka. Busa, kun aduna kay mga plano sa kinabuhi ayaw paghunong hangtod dili kini nimo makab-ot.

Matud pa ni Robin Padilla sa usa ka TV commercial. “Think positive, huwag kang aayaw.”

Kun tinuod ang imong tinguha sa maong babaye, kun tinuod ka sa imong gibati ngadto kaniya ayaw pag-surrender bisan pa man kun gipakitaan ka og dili maayong batasan. Tungod kay wala ka masayod kun unsay iyang tumong sa iyang pagbuhat sa ingon. Tingali kun gisuwayan ka lang kun unsa ka kamatinud-anon sa imong tinguha. Kay kun mo-surrender dayon ka iya kining isipon nga dili ka seryoso sa imong plano o tinguha kaniya.

Ayaw pakita og kahadlok. Ayaw ka-discourage. Ipakita nimo nga bisan unsaon ka niya, anaa lang gihapon ka andam nga magmahal kaniya. Ayaw kalimti ang usa ka title sa sine “walang matigas na tinapay sa mainit na kape.” -- Tita Salie