Pagkilab sa mga gutling, iyang naamgohan nga gibaswat siya ni Jeffrey. Gidala siya niini ngadto sa sulod sa payag. Mainampingon siyang gipahigda sa ulitawo sa salog nga hinimo sa tinibuok nga kahoy.
Wala makatutol si Danica sa dihang gitangtang ni Jeffrey ang mga salimbong sa iyang lawas. Ingon sa gilatayan sa kapid-an ka boltahe sa kuryente ang iyang lawas sa dihang gihagkan ni Jeffrey ang iyang ngabil, liog, punoan sa dalunggan, dughan ug sa...
Mihangos si Danica sa dili mahubit nga kalalim nga gidul-it ni Jeffrey kaniya. Unya nakapanguma siya sa bukobuko ni Jeffrey sa dihang giangkon na niini sa hingpit ang kaputli sa iyang pagka-babaye.
Nanawag si Jeffrey kang Col. Vince Noot nianang pagkaugma. Nalipay ang koronel nga nahinumdom siya sa pagpanawag niini. Nagpasalamat kini kaniya tungod sa mga impormasyon nga iyang gipadala ngadto niini nga maoy nahimong yawe sa pagkasikop sa tanang mga sakop sa Bangkulis Gang.
Nangutana si Col. Noot kaniya kun hain sila karon si Danica apan wala kini niya tubaga. Wala na lang usab mangutikuti ang koronel. Misulay hinuon kini pag-awhag kaniya nga mosurender na lang siya aron dili mosamot ang kadako sa iyang tulobagon sa balaod. -- Sumpayan pa