Balik sa gibiyaan nga kalibotan

Gula 47

Ang lasang ingon sa kalit nga nahigmata gikan sa lawom nga paghinanok sa iyang paghiabot. Miislag sa pagpanglupad ang mga langgam nga natugaw sa namugna niyang kasikas. Naukay ang mga unggoy nga ingon sa nangalisang pagkakita kaniya. Nagpalayo ang maong mga mananap kaniya tabok sa nagwakat nga mga sanga sa kakahoyan.

Sa diha na siya sa taliwala sa lasang, kalit mikayaw ang iyang hunahuna. Sa makadiyot naiya ang talan-awon sa mga uwak nga nagdala’g pagkaon alang kang Propeta Elias nga nagtago duol sa sapa sa Cherith didto sa Jordan.

Gipasuroy niya ang iyang mga mata sa palibot. May gipangita ang iyang panan-aw. Wala madugay, dihay iyang nalantaw. Nahinangop siya. Iyang gipadul-an. Nakaingon siya nga puno pa gihapon sa kinabuhi ang lasang sa Kaandis. Anaa pay daghang ihalas nga mga saging. Dili gani maato sa mga unggoy pagkaon ang bunga sa mga saging sa lasang.

Nagtan-aw sa bunga sa saging, kalit lang gikablit sa kagutom ang iyang tiyan. Gilanit niya ang sundang gikan sa sakoban nga iyang gitakin.

Gituba niya ang saging nga hinogan na ang bunga. Kadali rang miangka ang punoan sa saging sa kahait sa pinuti. Mihagsa ang bunga niini sa yuta.

Gidali niya pagkuha ang bunga sa saging. Dihay pipila ka dawin nga nadugmok kay naigo sa bato. Gidala niya kini sa hawanan nga dapit sa taliwala sa lasang. Mikaon siya. Mibati siya’g katagbaw human makakaon og pipila ka dawin sa hinog nga saging.

Human makapaniudto, si Gener namutol og mga kahoy, bagon ug kogon. Abtik kaayo ang iyang mga lihok. Ingon sa wala siya dutli sa kakapoy human sa hataas niyang panaw. Sa daplin sa lasang nagtukod siya’g payag. Gigakotan niya sa lig-on nga mga bagon ang mga dapat niini. Igong misaliid ang adlaw sa kahaponon, nahuman-human na niya paghimo ang payag. Iya kining giatopan sa mga dahon sa kogon. May salog na kini apan wala pay bungbong. Hinuon, mahimo na kining kapahulayan kun maoy tuyo ang pagpalabay sa kagabhion. -- Sumpayan pa