Mga talan-awon sa Pasko

Karon nga Disyembre na, makita na usab ang mga talan-awon sa kinabuhi ilabi na sa panahon sa Pasko. Duha ka talan-awon diha sa pagpuyo sa komunidad. Talan-awon sa kaharuhay ug talan-awon sa kalisod. Mao na kini ang kinabuhi sa mga Pilipino nga mahulagway gayod sa maong panahon.

Samtang ang mga adunahan nagbutang sa balay og mga dayandayan alang sa Pasko ug nag-andam og mga lamiang pagkaon, ang mga kabos walay espirito sa Pasko diha sa panimalay ug walay giandam nga mga pagkaon nga saw-an sa pamilya. Samtang ang mga adunahan adunay mga regalo nga nadawat, ang mga kabos uhaw sa maong mga gasa.

Ingon niini ang mentalidad sa mga Pilipino. Ang hatagan og regalo mao ang mga adunahan kay siguradong makabalos man sa paghatag og gasa. Samtang ang mga kabos, dili intawon hatagan kay dili man makahatag agi’g balos.

Usa ka talan-awon nga makatukbil sa kasingkasing sa tawo nga mahigugmaon sa kaangayan. Usa sa diwa sa Pasko mao ang paghinatagay. Apan pipila ra kaha ang naghatag og kahulogan niini.

Ang paglaom sa mga kabos nga makatagamtam og pagkaon nga bisan dili matawag nga lamian gayod, nga mahatagan sila og gasa sama sa biste nga bisag baratuhon ug uban pa, mao ang mga adunahan nga adunay lumo nga kasingkasing ug mga opisyal sa komunidad nga mogahin og pundo ngadto kanila, nga mahatagan sila og kalipay panahon sa Pasko.

Lisod pangitaon ang kuwarta karon. Apan alang sa mga adunahan, dili man tingali bug-at sa ilang bulsa ang pagpaambit sa ilang kuwarta ngadto sa mga kabos. Gamay nga regalo nga ihatag ngadto sa mga kabos makapalikay na kanila. Ug ang mga opisyal sa komunidad, magtan-aw sa estado sa pagpuyo sa mga kabos.

Kausa sa usa ka tuig ra ang Pasko. Ang kalipay nga bation sa mga kabos nga makatagamtam og mga regalo, bisa’g kini baratuhon, isipon na nila nga dakong butang nga miabot sa ilang kinabuhi.

Ang labing importante nga nahatagan og kalipay ang mga tawo nga uhaw sa kaharuhay bisa’g sa panahon lang sa Pasko.