Hulog sa Langit - Gula 3

Daw dili makatuo si Rey nga tinuod ang gireklamo sa babaye batok sa kapolisan nga giingong mi-raid sa iyang gipuy-an. Kun may kwarta pa ang maong babaye, sigurado nga dili kini magpataka og bilin niini sa lawak nga mahimo ra gani nga sudlon og tawo.

"Tana, ireport lang nato ni sa mga polis. Ubanan tika sa T. Padilla market kay tua man didto ang Cebu City police station-1 kay sakop man nila kining lugara," giingnan ni Rey si Jane.

Dili g'yud makatuo si Rey nga ang gwapa nga babaye nga iyang gikauban karon nakaako sa pagpuyo niadtong pait kaayo nga kahimtang. "Sakay na Jane kay adto ta sa T. Padilla," matud ni Rey human siya makasakay sa motor.

Ang mga tawo nga nakakita ni Jane igo lang mitutok kaniya. "Bag-o pa man ko dinhi nga nagpuyo Sir… tulo pa ko ka adlaw pag-abot gikan sa Butuan," giingnan ni Jane si Rey.

"Okay ka na?" gisukna ni Rey si Jane. Pagsugod pagpadagan ni Rey, gipaambak sa reporter ang motor sa gutter paingon sa karsada. Napagakus na usab si Jane kaniya. "Kalami," nakatuaw si Rey sa iyang kaugalingon ug napahit niya ang iyang ngabil sa kalalim.

Pag-abot nila sa T. Padilla market (ang nahimutangan kaniadto sa Cebu City Police Station-1 nga karon anaa na sa barangay Parian) misaka sila si Jane ug Rey sa ikaduhang andana sa market building.

Migunit si Jane sa kamot sa reporter. Kun dunay makakita kanilang duha magtuo g'yud nga sila maghigugmaay kay daw loving na kaayo sila nga tan-awon.

Giabi-abi sila sa desk officer. Dali ra nga gi-blotter ang reklamo ni Jane kay giabagan man usab ni Rey pagpasabot ang polis.

"Unya, gikan dinhi asa man ta paingon?" gisukna ni Rey ang dalaga. "Ikaw, asa may imong gusto?" ni Jane pa.

Nakalitan si Rey sa tinubagan ni Jane. Iya kining gitutokan ug gitagbaw niya ang iyang mga mata sa maanyag niini nga panagway. May gihuna-huna si Rey kay gipasiklapan niya ang iyang relo, ala 1:15 na.

Gawas gud nga reporter si Rey sa radyo, duna pa siya'y laing trabaho. "Unsay imong gusto, suroy-suroy usa ta?" gisukna ni Rey si Jane. "Ikaw gud… bahala ka kay dili pa ko gustong mobalik sa akong gipuy-an," matud sa dalaga.

"Sige Jane, angkas na kay mangaon usa ta. Adto ta sa atbang sa SM kay dagku kaayong hiwa sa tinuwa didto," matud ni Rey nga mipadagan dayon sa motor. Sa makausa pa natagamtaman na usab ni Rey ang lalim kaayo nga sitwasyon. (Sumpayan)