Masulob-ong Pasko sa nasud

Ang labing masulob-ong Pasko sa nasud mao ang Disyembre 25, 1941.

Bisan og gideklarar ni General Douglas McArthur ang Manila nga “Open City” nasugamak gihapon ang nahisgutang dapit sa makalilisang bombardiyo sa mga Hapones nga miresulta sa dakung kadaut sa mga kabtangan ug kamatayon sa atong mga kaigsoonan lakip na ang mga kabataan niadtong panahona.

Segun sa kasaysayan, ang mga edipisyo nga maayong pagkagusbat mao ang San Juan de Dios Hospital, Santa Catalina College, Santa Rosa College, San Juan de Letran ug ang College of Law sa University of Santo Tomas.

Daghang mga bapor ang nangaguba diha sa Pasig River gumikan sa bombardiyo sa mga Hapones.

Wala pasayloa sa mga bomba ang mga simbahan nga karaan na kaayo diha sa Intramuros, lakip silang nangaguba ug nangagusbat.

Dugang pang makapasubo nga balita atol ning petsaha mao ang gikataho nga pag-abot ug pagtakas sa 300 mil ka mga sundalong Hapones sa kabaybayonan sa Lingayen Gulf, Pangasinan ug sa Atimonan, Quezon.

Gikan sila sa China ug Hainan nga gi “pull-out” didto sa Tokyo aron sa pagkumpleto na sa occupation sa Japan dinhi sa Pilipinas.

Sa Enero 3, 1942 hingpit nang gi-establisar sa Japan ang ilang pagmando sa atong nasud diin si Major General Hayashi ang military administrator nga naglingkod sa Malacañang.

Ning pagselebrar nato sa Pasko karong tuiga, dili usab nato hikalimtan ang labing masulob-ong Pasko sa atong nasud nga mao ang Disyembre 25, 1941.

Magpasalamat kita ngadto sa kahitas-an nga gihatagan kita Niya og grasya sa maayong panglawas nga apil gihapon kita sa kasaulogan sa Pasko 2011.