Balik sa gibiyaan nga kalibotan

Gula 43

“Aduna pa ba goy matuod nga kalinaw ug kagawasan karon?” sa kumander pa. “Mahitabo lang tingali kana kun magmadaugon ang among kawsa.”

“Adunay tukmang panahon ug dapit alang sa tagsatagsa ka katuyoan,” naghulam siya’g kaalam sa Ecclesiastes sa iyang argumento. “Wala ko kawad-i og paglaom nga makaplagan ko ang akong gipangita.”

“Apan asa mo kini pangitaa?” dason nga pangutana sa kumander.

“Bisan asa, niya pa nga giul-og sa wala’y kinutobang pagpamasin.

“Wala mo pa isugilon kanamo ang bahin nianang patik sa imong lawas,” nagpakitubod ang kumander.

Miginhawa siya’g lawom. Ang iyang hunahuna naghan-ay og mga pulong nga maoy tukmang ipadayag ngadto sa pangulo sa mga rebelde. Gigambalay niya’g maayo ang angay niyang itug-an.

“Usa ako ka ex-convict,” misugod siya pag-asoy. “Bag-o lang kong nakagawas sa bilanggoan.”

“Unsay imong sala?” sa kumander.

“Nakautang ko’g kinabuhi,” mitug-an siya. “Gipatay ko ang mapalabilabihon ug tikasan nga adunahan sa among dapit.”

“Mao diay nga nabilanggo ka kay adunahan man ang imong nasad-an,” nagkanayon ang kumander. “Sayon ra gayod kitang mga kabos nga ipabilanggo sa mga sapian.”

“Pero bisan nabilanggo ko,” ni Gener pa, wala ko basuli ang paghunos sa kinabuhi sa maong adunahan.”

“Husto ka,” sa kumander pa. “Ang pagpuo sa mga sagbot sa katilingban dili angay basulan.”

Dihay lamat sa kahilom nga nahimong sapa sa ilang taliwala. Si Gener nagbarog sa usa ka tampi ug si kumander Turo didto sa pikas tampi. Ang kumander maoy naghimo’g tulay aron madugtongan ang ilang gipanagsultihan.

“Wala ka bay plano nga motipon sa among pundok?” mipalabtik ang pangulo sa mga rebelde.

“May kaugalingon akong gimbuhaton,” kadali ra siyang nakabunlot og tubag. “Pasagdi akong makapadayon sa akong panaw.”

Wala motingog ang kumander. Mitalikod kini kang Gener. Milantaw kini ngadto sa unahan -- habig sa kasadpan -- sa atbang nga bukid.

“Wala akoy katungod sa pagpugong kanimo,” namulong ang kumander apan nagtalikod kaniya. “Ihatag ko kanimo ang kahigayonan nga imong gipangayo.” -- Sumpayan pa