Gula 6
Wala makatingog si Jenny nga nakadungog sa pulong I Love You gikan ni Larry. Ang tinuod, may migitib na usab nga pagbati sa iyang kasing-kasing dihang gipanalipdan siya sa ulitawo gikan sa mibugal-bugal kaniya.
Dunay daklit nga kabalaka nga mihadla sa kaisipan ni Jenny nga sa umaabot nga mga adlaw sakitan lang siya kun makigrelasyon sa usa ka tawo nga dili sama kaniya nga taga probinsya.
Lawom kaayo ang iyang paghanduraw. Gipunting ni Jenny ang iyang panan-aw didto sa mga tawo nga nagsayaw apan ang iyang huna-huna daw nahulog sa halawom nga paghanduraw.
“Jenny, nganong daw wala ka sa huna-huna, unsay gitan-aw mo sa mga nanagsayaw?” nangutana si Larry. “Ha? Aw sori kaayo Lar, duna lang ko’y gihuna-huna.”
Giagni ni Larry si Jenny nga adto sila manglingkod sa lingkoranan nga hinimo sa guod nga kawayan daplin sa karsada. Didto sa ilang nahimutangan, dili na kaayo saba ang tugtog sa disco.
“Jen, isipon nako nga swerte ang akong pagka abereya dinhi sa inyong dapit sa barangay Bitoon kay kun wala pa, dili ko ikaw ikahibalag,” matud ni Larry. Nabasa ni Larry sa karatola nga dia diay siya maabereya sa barangay Bitoon, Dumanjug.
Nahakatawa si Jenny nga nakadungog sa balaknon nga sinultihan ni Larry. “Katam-is paminawon sa imong sinultihan Lar uy, mora ka man og dili taga ciudad.”
“Bitaw Jen, dili ako maantigo mobalak, apan kining akong gilitok maoy mga pulong nga hinukad gikan sa kinasuokang lawak sa akong kasing-kasing. Please, ayaw ko’g pakyasa and I’ll prove to you nga dili ko ikaw binuangan,” dugang ni Larry.
Nakita ni Larry nga nagpaingon sa ilang nahimutangan ang inahan ni Jenny. Gikuyawan si Larry kay nagtoo siya nga masuko kini nga nagsultihanay sila didto sa maong lugar.
“Day Jen, diay flashlight palihug ra og kuha sa listahan sa mga nakautang sa atong tindahan, tua nako gibutang sa ibabaw sa refrigerator. Sori usa Dong ha. Kadali ra na si Jenny,” matud ni Nang Tonya.
“Aw ako lang ubanan si Jenny Nang, balik ra dayon mi,” ni Larry pa nga daw nalipay kay makalugar siya.
Gigunitan ni Larry ang kamot sa dalaga samtang sila nanglakaw. May gikasugat sila nga pundok sa mga dalaga ug ulitawo. “Mao na siya Day?” gisungog si Jenny sa iyang mga amiga.
“Dali, sulod usa kay kuhaon nako ang gisugo ni Mama,” giingnan ni Jenny si Larry pag-abot nila sa balay. (Sumpayan)