Pinaskohan

Ay lang ko’g bayri. Libre lang na. Tagai lang ko’g pinaskohan” ni Atty. Roger Cortes dihang nangutana si Terence Nunez kun pilay bayad sa Joint Affidavit nga gipahimo ug gipanotaryohan sa abogado. Mapahiyomon ang abogado nga naglingkod atubangan sa iyang lamesa. Bag-o lang nahuma’g pirma ang abogado sa maong dokumento ibabaw sa iyang lamesa.

Ug ang klieyente naglingkod ning sayong kahaponon sa lingkuranan dikit sa toong tomoy sa lamesa sa abogado. Ikaduhang semana ron sa Disyembre ug nanimaho nang hamon kay nagsingabot na ang Pasko. Pag-umangkon ni Roger sa pag-agawan si Terence. Anak ang naulahi ni Ernie ig-agaw ni Roger. Ang inahan ni Ernie nga si Lina manghod sa amahan ni Roger nga si Dario. Nagdahom ang abogado nga mas dako siya’g madawat kun pinaskohan iyang pangayoon.

Bag-o lang abot gikan sa abroad si Terence. Computer programmer siya sa usa ka dakong kompanya sa Dubai. Dako kaayo’g sweldo. Duha pa lang gani ka tuig sa gawas, nakapatukod na siya’g bungalow sa usa ka inilang subdivision sa baryo Hevea ning dakbayan. Nakatabang na sab siya’g gasto sa pagtungha sa iyang duha ka manghod. Kamaguwangan man siya. Unya mahug nga nagkalisod iyang mga ginikanan. Kay bisa’g brayit unta kaayo iyang amahan nga valedictorian gikan sa elementary ug hayskul, unya scholar sa kolehiyo, di man magdugay sa trabaho. Kay di man motahod sa manedyer. Mosukol siya’g manedyer. Siya ang mangitag sipyat sa iyang manedyer. Inig kakita niya’g sipyat sa manedyer, siya ang mataktak. Dili ang manedyer.

Gradwado unta’g kursong Marine Engineering si Ernie. Suma Cum Laude. Apan wa kalahutay og trabaho og barko. Duha ra ka bulan. Kay di kakaya sa kabaho sa ilawom sa makina sa barko. Labi na kun dagko ang bawod inig biyahe. Nasakit siya. Gigastohan sa kompanya sa barko, para tambal, doctor ug ospital. Apan pagkaayo niya, di na motrabahos barko. Nangaplay na lang og mga planta o paktori. Apan mao lagi. Di magdugay sa trabaho kay gustong mohawod pa sa manedyer. Ang inahan na lang unta ni Terence nga si Tessie ang manarbaho. Kay maanyag, magmodelo unta sa mga cosmetics sa department store. Wa sab tugtig patrabaho ni Ernie kay sobra siya ka seloso ug possessive kaayo sa iyang asawa. Nahitabo gyud nga pag-abroad ni Terence, siya ang nahimong padre de pamilya sa tibook nilang pamilya.

May problema si Terence sa iyang mga papeles. Nagkalainlain og spelling iyang ngalan sa lainlaing mga dokumento. Sa iyang baptismal certificate “Terrens” iyang first name. Sa record sa SSS, “Terrench” iyang ngalan. Busa nagpahimo siya’g Joint Affidavit sa iyang uyoang abogado. Sa unang adlaw sa pagpangunsulta ni Terence sa abogado, gitambagan siya nga manghangyo og duha ka silingang mga hamtong nga tawo. Labing maayo kun mas tiguwang pas iyang papa.

“Ang gikinahanglan nimo Joint Affidavit of two disinterested person” matud sa abogado sa unang pagbisita ni Terence.” Ang gipasabot anang disinterested person, kanang tawo nga dili nimo kadugo ug dili sab nimo karelasyon tungod sa kaminyoon. Dili nimo bayaw o in-law. Modeklarar sila nga kanang tanang ngalan nga sayop og spelling, ikaw gihapon ang gitumbok ana,” dugang sa abogado.

Nakasabot si Terence ug nagdala siya sa bupete og duha ka tawo nga ilang silingan nga gipadala niya’g valid ID. Puro drayber iyang nadala nga sila si Conrado Aragon ug Sendo Tampus.Nagdala’g ilang mga driver’s license. Paghuma’g pirma nila, nagdali’g gawas sa bupete kay nagyawat sa ilang round trip. Dyip depasaheroan may ilang gipangdrayban. Gipahinungdan ni Terence ilang kalangan paghuman nila’g pirma sa Joint Affidavit.

“Nia ra tiyo o. Merry Christmas” ni Terence nga mapahiyomong nagtunol og pulang sobre nga silyado sa uyoan. “Salamat kaayo Dong Terence. Buotan gyud kaayo ka. Merry Christmas” ni Roger nga nagpahiyom sab. Gihapuhap ang ulo sa pag-umangkon.

Pagbiya ni Terence, gilili dayon ni Roger ang sulod sa sobre. Dos sintos pesos tibook ang sulod. Nakaingon siya sa hilom nga maayo pa nibungat na lang siya. Kay P300.00 may iyang PF sa affidavit. (Kataposan) (Sa gusto’g libreng kunsulta, dad-a ning pahina sa opisina sa tagsulat. Iatol og Sabado sa buntag)