Gula 5
Ang daw hubog na nga lalaki mikalit lang pagsuntok ni Larry. Wala makaigo ang lalaki kay abtik si Larry nga mitapi sa bukton sa lalaki. Apan kalit nga nanindog ang duha niini ka kauban ug mitabang pag-atake ni Larry.
Nagubot ang mga tawo dihang nagharong na si Larry ug ang tulo ka tawo. Gilibotan sa tulo si Larry ug kadtong unang misuntok ni Larry milipot sa luyo. “Pagbantay Larry duna siya’y kutsilyo!” nakasinggit si Jenny.
Diha-diha nga milihok si Larry ug gidis-armahan sa kutsilyo ang lalaki nga midunggab unta kaniya. Ang duha ka kauban niini nga mihana pagduol maayong pagkasipa sa patid gikan ni Larry.
Wala matagbaw nga nadis-armahan na siya sa kutsilyo, kadtong lalaki mikuha og kahoy aron ibunal kang Larry, apan ang ulitawo kalma ra nga milihay ug sa laing higayon giilog ang kahoy.
Gitorse niini ang kamot sa lalaki. Ang duha ka kauban sa lalaki hinay-hinay nga mibangon ug miatake na usab unta apan tagsa-tagsa sila nga naigo sa laing mga patid gikan ni Larry.
“Lar, salamat sa pagluwas nimo nako. Tua na gidala na sila sa mga tanod,” gigunitan ni Jenny ang kamot sa ulitawo. “Wala ka maunsa? Maayo ka man diay sa martial arts,” dugang pamahayag sa dalaga.
Miabot ang amahan ni Jenny didto sa diskohan ug gitug-anan kini ni Jenny sa hitabo. “Salamat Dong nga gilabanan nimo si Jenny sa nagbugal-bugal kaniya.”
“Nganong maayo ka man sa martial arts Lar?” nangutana si Jenny kang Larry nga daw nahimo na niya nga suod nga higala. “Gitudloan ko kaniadto ni Sensei Dhong Reynaldo sa Comjukai Aikido.”
Miapas ang inahan ni Jenny sa diskohan. “Panayaw mo didto si Jenny Dong.”
Tuod man, nagpares pagsayaw sila si Jenny ug Larry nga maoy nakapasamot sa ilang kasuod.
“Wala ba dinhi ang imong boyfriend Jen? Basin og magselos nga makakita nato,” ni Larry pa. “Wala pa ko’y boyfriend Lar uy, pero naay daghang nanguyab, usa kadtong imong nakulatahan.”
“Kun mao kana, posible diay nga mahimo ko nimong boyfriend,” nagngisi si Larry. “Kuyaw kaayo ning taga ciudad Lar kay binuangan lang ang taga probinsya kun ilang mauyab,” dali nga tubag ni Jenny.
Gitutokan pag-ayo ni Larry ang panagway ni Jenny. Dali ra kaayo nga nabihag sa dalaga ang iyang pagbati. “Ayaw pagtoo nga abi kay karon ra kita nagkita Jen, nagbinuang ko nimo. Dali ra kaayo ko nga mibati’g gugma kanimo. I love you Jenny.” (Sumpayan)