Ang monyeka ni Inday Malou

Kalit lang nga mitimbukwas si Loring gikan sa iyang gihigdaan sa dihang nabatian niya ang kusog kaayong pagtiyabaw sa iyang kamanghurang anak nga si Inday Malou didto sa ilang may nataran.

Midali dayon siya’g tambo sa bintana sa iyang kuwarto aron sa pagsusi kun unsay hinungdan sa paghilak ni Inday Malou. Puwerte man gyud niining ngaaba. Nga milanog pag-ayo sa tibuok palibot ug misangko na gani hangtod ngadto sa iyang nahimutangan ni Loring.

Sa pagtambo gayud ni Loring sa bintana, mao gayud ang iyang nakit-an si Inday Malou nga nagsigi’g kisikisi diha sa yuta. Ug nagsigi gihapon og hilak. Samtang nanag-alirong kaniya ang ubang mga kabataan nga puwerte usab nga nakakatawa.

“Naunsa na si Malou?” gipangutana ni Loring ang mga kabataan nga nanagpundok. Nga iya ra usab mga anak uban sa mga kaduwa niini.

“Nasuko uroy nga gihilabtan ni Jun Riel ang iyang monyeka,” maoy mitubag si Anamie nga maoy pinaka- maguwang sa tanan. “Igo ra tuod nakong gihikap ma. Unya, kay iya man kining gibirag kalit, naputol hinuon ang usa ka kamot,” nangatarungan si Jun Riel nga morag nahimuot.

Nasabtan dayon ni Loring kun nganong morag nahimuot si Jun Riel sa nahitabo sa monyeka ni Inday Malou. Daan naman sab god kaayo ang maong monyeka. Pinunitan man lang god ni nila sa may tapukanan sa mga basura. Linabay na tingali kini sa tag-iya niini. Nga anak tingali og sapian. Gubaon naman gud ang maong monyeka. Kay gawas nga wala na mahitsas ang buhok niini, naputol na usab ang pikas kamot. Gani, giayom-ayom na lang kini ni Anamie, nga mao gyud ang nakakita niini. Ug mao usab ang mihatag sa maong monyeka ngadto kang Inday Malou, nga iyang manghod.

Diha palang mohilom si Inday Malou human ayoha ni Anamie ang monyeka ug gitunol ngadto kaniya. Unya, mihinay kini pagtindog, nga nagkugos na sa monyeka. Ug mipadayon sa pakigduwa niini.

Mora hinuon og gihilap pag-ayo ang balatian ni Loring nga nagsud-ong kang Inday Malou nga malipayon kaayong nakighagwa sa iyang monyeka. Bisan tuod kun gubaon na kini. Ug sinumpayan na gani ang usa ka kamot niini.

Naluoy kaayo siyang nagtan-aw sa iyang anak nga nagmantinil lang intawon sa pagduwa og usa ka monyekang gubaon na kaayo. Ug pinunitan lang gani sa tapukanan sa mga basura. Ug sa iyang nakita, daw paghikit-an usab niya ang larawan sa ilang kawad-on. Ang ilang katimawa ug kakabos.

Wala lang tuyoa nga naitlib ni Loring ang iyang ngabil. Dungan ang pagkahimugso sa usa ka buhing panaad. Diha sa iyang kasingkasing, natawo ang usa ka saad nga paningkamutan gayud niyang kapalitan og bag-ong monyeka, ang iyang kamanghurang anak, nga si Inday Malou. (Katapusan)