Balik sa gibiyaan nga kalibotan

Gula 39

Ang kahayag sa taudtaod nang nakasubang nga adlaw nakalusot sa bentana sa payag nga nahimutang taliwala sa masiot nga lasang. Ang kainit sa dan-ag sa mata sa langit daw kamot nga mihikap sa panit ni Gener. Nahigmata siya nga gihimamat sa kahikugang. Gianinaw niya ang palibot sa dapit nga iyang nahimutangan. Nasuta niya nga ania siya sa dapit nga dili niya sinati.

Mihunat siya pagbangon gikan sa gihigdaan nga lantay. Apan wala siya’y igong kalig-on pagbuntog sa gahom sa kaluya. Mitarong na lang siya paghigda. Nabatyagan niya ang pagpanakit sa tibuok niyang kalawasan. Gingislo niya ang iyang nawong.

Inanay’ng mitin-aw ang iyang hunahuna. Nahanaw ang gapnod nga milutaw sa iyang kaisipan. Nahinumdom siya sa nahitabo kaniya kagabii. Nahulog siya sa mga kamot sa nagpatrolya nga mga sundalo. Nahiagom siya sa ilang kabangis. Takulahaw milab-as sa iyang panumdoman ang gisulti ni Lucia. Nasuta na niya ang kamatuoran sa mga pulong sa iyang asawa. Hilabihan kaabusado ang mga sundalo nga nadestino sa ilang dapit.

Ang maong hitabo ingon sa kalit lang gitapdas sa hangin. Dihay laing nanuktok sa iyang kaisipan. Migiswid sa iyang hunahuna ang pangutana kun kinsa kaha ang maayong Samaritanhon nga nakabangal kaniya. Ang maong pangutana nahimong tanghaga nga gitigmo sa iyang kaisipan.

Naigking siya dihang nabati niyang may misaka sa payag. Mitagbo sa iyang panan-aw ang bayhon sa usa ka lalaki nga nagsul-ob og sapot nga iya sa usa ka manggugubat.

Ang ulo niini gipurongan sa pula nga panapton. Gitutokan niya kini pag-ayo.

Bayhon sa usa ka manggugubat ang iyang nakita sa lalaki nga misaka sa payag nga iyang nahimutangan. Nagkabiba kini’g armas nga taas og kalibre. Ang lawas niini gibilikisan sa mga daghang magasin sa mga bala. May pistola pa nga gitakin sa hawak niini. Ingon sa andam kanunay sa bisan unsang mahitabo. Masabot nga daw dili kini gustong maagrabyado.

Apan lahi ang maong tawo sa mga sundalo nga iyang gikabagat kagabii. May kaaghop nga gitipigan ang bagang mga bungot nga nagkapal sa nawong niini. Wala’y kabangis nga iyang nasihag sa panagway sa maong manggugubat.

Kalumo sa balatian ang iyang nasil-ip sa kinidlap sa mga mata niini.

“Nagmata ka na diay?” ang lalaki mihagad pagpakigsulti kaniya.

“H-hain ko?” ubay sa kaluya ang sumbalik niyang pangutana.

“Ayaw kabalaka,” tubag sa lalaki. “Nia ka sa maayong kamot.” -- Sumpayan pa