Maunongon ang gugma

Nakadawat og report si Col. Vince Noot gikan sa usa sa iyang mga asset nga ang grupo ni Randy Unson mipaingon sa Carcar. Nagpatawag dayon siya’g briefing sa mga sakop niyang polis. Nakahukom siya nga sundan nila ang grupo ni Randy ngadto sa Carcar.

Nagtuo si Col. Noot nga may operasyon sa drugas ang grupo ni Randy sa Carcar maong nakig-coordinate usab dayon siya sa mga sakop sa kapolisan sa maong lungsod.

Tayming kaayo kining hitaboa kay bag-o lang milusot ang warrant of arrest alang kang Randy Unson nga giisyu sa sala ni RTC Judge Fortunato Garcia. Sukad gud nga nadawat ni Col. Noot ang mga dokumento nga gipadala ni Jeffrey kaniya nga may kauban pang video tapes, gipaladman na niya ang imbestigasyon batok sa Bangkulis Gang.

Nasuta ni Col. Noot nga lawom gayod kaayo ang involvement ni Randy Unson sa Bangkulis Gang. Usa kini sa lig-ong mga haligi sa sindikato sa drug trafficking nga naglihok sa probinsiya sa Sugbo. Mao nga human siya makatigom og kongkretong ebidensiya, gipaningkamotan niyang malutsan gilayon og warrant of arrest si Randy.

Atol sa police briefing, gidetalye pag-ayo ni Col. Noot ang iyang gihan-ay nga plano kun unsaon pagsikop si Randy uban usab sa pag-abag sa kapolisan sa lungsod sa Carcar. Gipasabot niya’g maayo ang iyang mga sakop sa angay nilang buhaton. -- Sumpayan pa