Maunongon Ang Gugma

Gula 80

“Ambot lang kaha, Boss,” ni Kirat pa. “Kay matud pa sa akong sinugo, ingon sa suod man kaayo si Danica ug ang lalaking kuyog niini.”

“U-unsa?” kun mao kana, kinsa man diay kadtong maong lalaki?”

“Ambot lang, Boss. Wala sab makaklaro ang akong sinugo sa nawong sa maong lalaki tungod kay nagkalo man kini ug nagsul-ob og sunglasses. Ang naseguro lang sa akong sinugo mao nga si Danica gyod ang babaye.”

“Dili na lang nato libogon ang atong mga hunahuna kun kinsa ang maong lalaki. Ang importante mao nga nasayod na kita kun hain karon si Danica.”

“Unsa plano mo karon, Boss?”

“Paandama ang atong mga sakop kay karon dayon mangadto kita sa bukirang bahin sa Carcar diin atua didto magtago si Danica uban sa kauban niining lalaki. Masayran ta unya kun kinsa gyud ang maong lalaki nga gikauban ni Danica.”

“Dili ba kaha boyfriend ni Danica ang maong lalaki, Boss?”

“Nagtuo kong dili. Si Efren lang ang nasayran kong iyang hinigugma. Apan patay na si Efren. Ako na siyang gipatay aron wala nay makababag sa pag-angkon nako kang Danica.”

Kahilom.

“Busa, pangandam na kamo, Kirat,” subling mando ni Randy Unson. -- (Sumpayan)