Boy ug Maid

Naabot sa huna-huna ni Lino nga kinahanglang dili siya mag-usik og higayon. Milingi-lingi siya sa palibot ug maoy nasiplatan niya ang mga tulo ka dangaw nga tubo sa tubig nga gisandig sa kilid sa balay.

Gikuha dayon kini ni Lino ug hugot nga gigunitan. Gisikaran niya ang pultahan sa kwarto ni Precy ug diha-diha kini nga naabli. Nabantang dayon sa panan-aw ni Lino si Marco nga nagsugod na paghukas sa iyang mga sapot.

Si Precy naghigda sa katre nga wala nay sapot ang tibuok lawas. “Unsa ni ang imong gihimo kang Precy sir Marco!!!” misinggaak ang tingog ni Lino sa tibuok lawak.

Nakalitan si Marco apan gitiwas niini paghukas ang iyang karsones. Ang nag-brief na lang nga agawon mihasmag kang Lino nga nagpaminti sa kasuko ang dagway. Apan abtik nga giwiktan ni Lino sa tubo’s tubig ang iyang bukton.

Mikilisiw si Marco nga naigo sa pagbunal ni Lino kaniya ug nagliraw-liraw ang mga mata sa palibot sa kwarto. Nasigpatan niini ang usa ka kutsilyo nga diha sa gamay’ng lamesa nga tingali giandam kadto ni Precy aron ipanalipod sa kaugalingon.

Nakuha g’yud ni Marco ang kutsilyo ug nagharong sila si Lino. Nagpaminti na g’yud sa kasuko si Marco ngadto sa iyang boy. “Hilabtanon ka kaayo Lino. Anhi ka karon matudas!”

Mihasmag si Marco kang Lino nga napaatras sa suok sa kwarto, apan nagbilin kini’g witik nga nakapaigo sa abaga ni Marco. Misamot kaisog si Marco ug mihasmag pag-usab. Nakalihay si Lino sa dunggab apan nasamdan siya sa bukton.

Kini maoy nakapainit pag-ayo ni Lino sa kumbati. Gihunat niya ang sunod-sunod nga mga hapos sa tubo nga puthaw. Nag-atras-atras si Marco aron dili maigo apan kalit lang natagak ang kutsilyo sa iyang kamot nga naigo sa pagbunal sa ulitawo.

“Ayaw Lino, hunonga na ang pag-atake nako!” daw nagpakilooy na si Marco sa iyang boy. Apan si Lino daw giharian na sa tinguha nga makabawos kay nasiplatan niya nga nabulit na sa dugo ang iyang bukton nga naigo sa dunggab.

Gihapsan niya’g kusog pagbunal ang ulo sa iyang agawon ug diha-diha kini nga natumba sa sawog. Wala na kini maglihok ug nakita ni Lino ang daghang dugo nga migawas gikan sa ilong ug ba-ba ni Marco.

Naghangos si Marco sa kakutas sa ilang kumbati sulod sa gamay’ng kwarto. Milihok si Precy. Gitutokan ni Lino ang tibuok lawas niini nga walay sapot. Nagtubod ang laway ni Lino nga nagsud-ong sa makabuhong nga talan-awon. (Sumpayan)