Hawid sa impiyerno

Nakamata ko sa pagkatungang gabii tungod sa sugo sa lawas. Nakugang ko pagkamatikod kang Liza nga naglingkod sa ngilit sa iyang higdaanan. Nadiyong ang akong mga mata nga mitan-aw kaniya og dugay. Hayag ang servant’s quarter kay dili man kami magpalong sa suga kun mangatulog kami. Naghinuktok si Liza.

Human ko mangihi sa urinola, giduol ko si Liza.

“Nganong wa ka pa man matulog?” Bisag nasayod ko kun unsa ang nakahasol kang Liza, gipangutana ko gihapon siya.

“Si mama Carmen kinahanglang operahan na gyod sa iyang tumor sa matris, Lyka.”

Nahilom ka. Naluoy ko sa akong higala. Managsama kaming anak og kabos maong ania kami karon sa siyudad, misulod sa pagka sulogoon sa adunahang magtiayon nga sila si Sir Hector ug Mam Elena.

“Nanawag ang akong igsoon ganinang hapon. Dili na makaantos si mama sa kangutngot nga gibati sa iyang matris.”

Naghingushingos si Liza. Nasuta ko nga naghilak siya. Mitupad ko’g lingkod kaniya. Nakasabot ko sa iyang gibati.

“Nahangyo mo na ba sila si Sir ug Mam?” Gikuptan ko ang bukton sa akong higala.

“Dili magpahuwam og kuwarta si Mam Elena. Nasayod ka na bitaw sa iyang kinaiya. Lyka. Grabe ka dawo.”

“Unya, si Sir Hector, unsa may iyang sulti?”

Inay motubag nanghupaw hinuon si Liza. Miluom siya paghilak. Gigakos ko ang akong higala. Midanguyngoy siya sa akong dughan.

Managsama kami’g edad si Liza, desiotso anyos. Igo lang kaming nakahuman sa hayskol sa among lungsod sa San Isidro. Silingan kami. Nanimpalad kami sa siyudad, ug gikalipay na namo nga nadawat kami sa pagka sulugoon.

“Gimahal ko kaayo si mama, Lyka. Kinahanglang maoperahan siya.”

Milabay ang duha ka adlaw. Gidala si Nang Carmen sa ospital sa siyudad. Nahibulong ko kun diin og kuwarta si Liza. Apan gipalabi ko nalang ang pagpakahilom, wala na ko mangutana sa akong higala bahin niini.

Si Liza gayod ang nangunay sa pagbantay sa iyang inahan sa ospital. Supak unta si Mam Elena kay mapasagdan ni Liza ang iyang trabaho sa dakong balay, apan miuyon si Sir Hector. Wala nay nahimo ang agalon kong babaye.

Hamtong na sila si Sir Hector ug Mam Elena. Duna sila’y mga negosyo sa siyudad. Adunahan man tuod sila apan haw-ang ang ilang pagpuyo kay wala sila’y anak. Kanunay silang maglingawlingaw sa Casino, kaha aron pagtalikod sa kalaay sa ilang kinabuhi.

Dihang nakagawas na si Nang Carmen sa ospital ug maayo na siya, migawas usab si Liza sa trabaho sa magtiayong Sir Hector ug Mam Elena.

“Desidido ka na ba gyod, Liz?” Naguol ko kay ako na man lang usa.

“Oo, Lyka. Adto na lang ko sa ato sa San Isidro. Atimanon ko si mama.”

Mapahiyumon na kaayo si Liza. Wa gyod nako siya kapugngi. Gilaayan ko nga nag-inusara na lang sa pagka sulugoon. Usa ka hapon, nag-grocery ko sa Gaisano Metro kay gisugo ko ni Mam Elena. Nakugang gyod ko sa akong nakita sa duha ka binuhat nga malipayong naglakaw sa aseras sa Colon.

Si Sir Hector ug Liza! Nag-agbay si Sir Hector kang Liza. Nindot na kaayong gisul-ob nga mini skirt si Liza. Duna nay mga alahas sa lawas. Misamot katahom ang akong higala.

Igo na lang kong nagpanglingo sa akong nasaksihan. (Katapusan)